УВЕР ЙОГЫН

Кудалтен кодаш ида вашке

Пытартыш жапыште йочалан, тудым шотан айдемым да гражданиным ончен куштышашлан кугу тӱткыш ойыралтеш. Ача-ава-влак икшывыштым кудалтен ынышт кодо, тудо тичмаш ешыштак илыже манын, ятыр организаций ден учреждений тыршат. Кугыеҥ-влакын намысыштым «помыжалтараш» манынат, газет ден журналлаште, Интернет-сайтлаште могай-гына статья огыт возалт, телевизор дене могай-гына передачым огыт ончыкто?! Поснак социальный ролик-влаклан кызыт утларак эҥерташ тӱҥалыныт. Тиде пашашке кумдан палыме еҥ-влакым чӱчкыдынак ушат.

Мом шылташ, ача-шамыч, ватыштым кудалтен, вес ӱдырамаш дене ушнат. Тыгодым кӧ ик эн чот йӧслана? Икшыве. Сандене тыгай сӱрет илышыште шагалрак лийже манын, Неле илыш ситуацийыште улшо йоча-влаклан полшышо фонд Интернетыште «ответственное родительство» манме теме дене рекламе-увер материал-влакым савыкта.

Тыге, мутлан, «Отцовство – твой главный жизненный проект» циклыште икмыняр видеороликым вераҥдыме. Иктыштыже театр да кино актер Анатолий Белый, весыште музыкант, актер, телевӱдышӧ Алексей Кортнев ача улмо – тиде мо, тудо могай шижмашым лукмо нерген шке шонкалымашышт, умылымашышт дене пайлалтыт. Мутлан, А.Белый ойла: «Шочшем-влакын ачашт улмем дене мый пиалан улам». 

А.Кортнев тыге каласкала: «Кугыеҥ-влак, вате ден марий, ойырлат гынат, йоча палышаш: ачаже – эре воктеныже. Сандене икшывыда йыҥгырта гын, тудлан эре вашештыза. Шкежат пӱтыралаш ида мондо. Тыге йоча шижеш: кузе илымыж нерген ачаже палынеже. А тугеже те тудым йӧратеда да илышыштыже улыда».

Моткоч сайын каласыме. Кудалтен кодышо ача-влак, умыледа?..

Чыла тиде молан ышталтеш? Икшывын кызытсе да ончыкылык пиалан илышыж верч. Пӧръеҥ-шамычлан, йоча-влакын шочмо ачаштлан, умылтараш шонымаш дене: шочшетын илышыжлан тый мутым кучет. Ош тӱняшке шочыктенат – кушто, полшо, кудалтен кодаш ит вашке. Но чыланжак тидым умылат мо? А ӱшаныме шуэш ыле…

Любовь Камалетдинова.

Опубликовать в Одноклассники

Добавить комментарий