КУЛЬТУР ДА ИСКУССТВО

Тиде Салика огыл – йӧршынат, тӱвытат, нимынярат

Тений февраль кыдалне «Марийская правда» газет Марий Элын туристический брендшылан шотлаш темлыме Саликан сӱретшым савыктыш. Тушто возымо: «Салика – это фольклорный собирательный образ марийской женской силы, девушки-хозяйки, хранительницы очага, которая знает женские ремесла, секреты семейной жизни… Ожидается, что Салика примет участие в масленичных гуляниях, на которых все желающие смогут с ней познакомиться».

Лачак ик арня гыч «Марий Эл» газетеш Светлана Носован «Ала Салика, ала Салика огыл…» статьяже лекте. Тушто раш каласыме: темлыме тиде «брендым» нигузеат сайлан, лачеш толшылан шотлаш ок лий. Мыят С.Носован возымыж дене тӱрыснек келшем. Эн ончыкак, Салика фольклор гыч налме образ огыл. Вес могырымжо, сӱретысе айдемын сынже марий сценыште шуко гана ужмо, пеш уста артистке-влакын: Нина Конакован, Прасковья Смирнован, Анастасия Тихонован, Майя Романован, Галина Иванован, Валентина Моисееван, Валентина Васильеван, Зинаида Долгован, Светлана Гладышеван, Светлана Строганован да молынат – мастарын ончыктымо образ деч пеш чот торлен шога. Драматургийымак ончалаш гын, сӱретысе саде ӱдырамаш шоҥгылыкешыже мужырым муаш толашен коштшо Эчан ватым але Арсий Волковын «Йорга вате» комедийже гыч тӱҥ героиньым ушештара.

Мылам тыге чучеш: «Салика» комедийым возымо да сценыште тудын 80 ий утла илыме историйым ялт палыдыме, марий ӱдырын (ӱдырамашын) тӱжвал моторлыкшым ужын да умылен моштыдымо еҥ гына шке ушыштыжо да вара кагазыште тыгай образым шочыктен кертын. Но вот ӧрмаш: тиде тупела «брендым» газетыште ончыктымо деч вара ятыр кече эртыш гынат, тиде образ шотышто шке шонымашыжым печатьыште нигӧат луктын ыш каласе.

Але марте поэт-влак Сергей Николаевын комедийыштыже ончыктымо тиде сылне ӱдырым моторлыкын, яндар чонын символжылан шотленыт. Тыге возеныт марий-влак веле огыл. Эше пел курым утла ончычак руш поэт Сергей Макаров ик стихыштыже возен:

Над январскою Немдою-рекою

Девушка из Нового Торъяла

Назвалась мне тихо Саликою

И на лыжах быстро убежала.

Знаю я: в одной марийской пьесе

Это имя очень знаменито…

Я смотрел ей вслед, как светлей песне…

Ынде шоналтен ончыза: С.Макаровын ш¢м-чоныштыжо Саликан образше саде соптыра «бренд » семын с¢ретлалтын лиеш гын, поэт нине сылне ойсавыртышлам возаш тарана ыле мо? Уке, тудо лучо иктаж-могай койдарчык куплет-влакым серен шында ыле.

Землякна, татар еҥ Фарид Типаев Пеледыш пайремлан пӧлеклалтше почеламутыштыжо (1990) Саликам ушештарыде коден огыл:

В тени деревьев – музыка и танцы,

И под оркестр военный духовой

Лесная Салика поёт романсы

В нарядном платье с голубой каймой…

Кодшо курымышто марий писатель-влак Озаҥ кунак (уна) Самат Шакирым Йошкар-Олаште ик гана веле огыл вашлийыныт. Тунам, 1960-шо ийлаште, татар поэт марий ¢дырлан моктеммурым возен:

Ах, Салика, девушка-марийка,

Веришь ли ты в счастье и добро?

Ах, Салика, мне в письме пришли-ка

Гуся или лебеди перо.

Ах, Салика, бровь твоя дугою

Выгнута, и косы на груди.

Ах, Салика, вряд ли мне с другою

Счастье лебединое найти.

О тебе мечтаю вечерами,

Звездный свет ловлю печально вновь.

Ах, Салика, помнишь, как над нами,

Словно лебедь, реяла любовь?

Я в твоей деревне от рожденья

Не бывал, но знаю твой народ.

«Эренгер» Шкетана с волненьем

Я читаю… Грусть меня берет.

И опять я вижу, словно в детстве:

За рекой в сиянии луны,

Там, в твоей деревне, тянут песни

Горестные парни-плясуны.

Ты об этом знала понаслышке,

И в свои неполных двадцать лет

Шла ты – помнишь? – в университет

С лекциями и со стопкой книжек.

Не в лугах, где вьётся повилика

В плеске солнца майской кутерьмы,

А в Москве, прекрасная марийка,

Повстречалась и расстались мы.

Сколько отцвело с поры той вёсен!

Ты ко мне являешься во сне…

Если, твой портрет увидев, спросят:

— Кто это? Что – подскажи – ответить мне?

Самырык Геннадий Чемеков татар ипташын серымыжым тунамак марлаҥден:

Улат, Салика, пеш мотор марий ¢дыр,

Молан огеш тол тый дечет ик письмат?

Ош комбын ший пыстылжым л¢мын

Ала колтыман серыш дене тылат?

Колат, Салика, шем шинчан чолга ¢дыр,

Тый олык пеледыш гаяк волгалтат.

Чатка ¢дыр-влакым кеч ужым мый ш¢дым,

Но тый сылныракше улат, товатат.

Шонем шерге еҥым тылзан умыр й¢дым

Да ш¢дыр ден тыйым таҥастарем.

Ушем ден улам мый эре тыйын кӱдынь,

Лач тыйын лӱмеш йоҥгалтеш у мурем.

Тендан ялеш огыл мый шочым да кушкым,

Садак сай палем вет марий калыкдам.

Тудлан ожно годым пернен ойго шуко,

А кызытсе тукым ила пиалан.

Тыят, Салика, шыргыжат кече семын,

Книга гычын лачак тый ожсым палет.

Кугу шонымаш да куан дене темын,

Университетыш тый таче пурет.

Колат, Салика, могай поро ш¢метше,

Ласка кумылан да тунемше улат…

Ик шошо кастен вашлияш полшыметлан,

Кумда аудиторий, тау тылат!

Шӱм-чон йӱлымашым йӧртен ышак сеҥе

Эртен кодшо пагыт. Колат, моторем?

«Кӧ тиде фотошто шинча?» манше еҥлан

Кузе вара мый каласем?

Ойлыманат огыл, Саликалан эн шуко чапмурым марий автор-влак возеныт. Поэт Валентин Дмитриев пагалыме драматурглан 1986 ийыште «Карман курык» почеламутым пӧлеклен. Тушто тыгай корно-влак улыт:

Волем ынде, кӱ орам ончышт.

Оҥайын чучеш чынжымак:

Иленыт овда-шамыч ончыч

Тыгайыште пуйто. Ожнак.

Садлан ала-кӧ лишыл ялым

Овдасола манын лӱмден.

Илат шоҥго-шамыч шарналын,

А самырык тукым монден.

Ты ялым ужде омак кае.

Садерже сӧрал солыкан.

Тышакын Сергей Николаев

Вашлийын ала Саликам?

Илен-толын, Салика л¢м литератур ден театр деч ӧрдыжкӧ лектын. Ятыр поэтлан тиде л¢м моторлыкым, яндар чоным, волгыдо йӧратымашым, марий кумылым ончыктышо символыш савырнен. Писатель да литературовед Ким Васин 1987 ийыште келшымаш темылан серыме ик статьяштыже тыгай фактым ончыктен. Башкир поэт Назар Наджми «Латик муро» поэмыштыже Салика лӱман марий ¢дырын образшым сӱретлен. А тудын ш¢мбел таҥже – пошкырт йыгыт. Кок самырык чонын ваш-ваш йӧратымыштым поэт сылнын почын пуэн.

Чуваш литературышто тыгайрак символыш Нарспи – Константин Ивановын поэмыжын героиньыже – савырнен. Курыкмарий поэт Аркадий Канюшков 1979 ийыште чуваш ¢дыр нерген стихым возен. Сар деч вара, ойлалтеш тушто, изарня пазарыш салтак вургеманак миенам ыле. Корнышто ик ӱдырым поктен шуым. Вургемже сӧрале, чурийжат мотор. Ик жап пырля ошкылна. Мутланышна тӱрлӧ нергенат, «Нарспи» поэмымат шарналтышна. Ынде, манын поэт, пешак шонкалем: «Ала тиде ӱдыр Нарспи улмашын? А молан мый тудын поэмысе таҥже Сетнер гае чолга лийын моштен омыл…»

2018 ийыште Марий книга издательстве мыйын ямдылыме «Салика» ойпогым лукто. Книгам кузе сӧрастарыме нерген шонкалаш жап шуат, чоныштем марий с¢ретче-влаклан ӧпке шочо: «Кузе тыге лийын кертын? Молан але марте нунын кокла гыч иктыжат Саликан портретшым ыштен огыл?» Юмылан тау, художник В.Безденежных шкешотан тиде азап гыч лекташ йӧным муын: 1970-ше ийлаште Саликам шуко модшо актрисе Валентина Моисееван спектакльысе чиеман фотожым «Салика» книга комыш  келыштарен шынден.

Нарспи нерген ойлаш гын, художник Пётр Сизовын тудлан пӧлеклалтше 12 с¢ретшым Москосо «Изобразительное искусство» издательство эше 1970 ийыштак 50 т¢жем экземплярым ик ш¢дышеш савыктен. Иктыштыже – мотор ӱдыр шкеже, весыште – тудын Сетнер таҥже, кумшышто – нуно памаш воктене вашлийыныт… Эше иктыште – шучко сӱрет: нарашта Нарспим шоҥго Тахтаманлан шынден колтат…

Марий художник-влак Саликам уждымо-колдымо гай лийыныт гын, поэт-влак тудлан ятыр стихым пӧлекленыт. Эврик Анисимов «Шарна Салика» почеламутыштыжо возен:

Кажне ялын уло Саликаже,

Уло кажне ялын Эчукшат.

Мыйын пошкудемым але кажне

Огеш пале, кеч мотор капшат.

Л¢мжӧ тудын такше йӧршын весе.

Рольым Саликаным модын ик гана.

А Эчукшо, кушкын шушо рвезе,

Школым але пытарен гына.

Ямдылышт спектакльым, модын шуктышт.

Сар т¢ҥале вес эрденжылан.

Нуным торыш шуко-шуко уштыш –

Кодышт ялым каче-влак чылан.

Салика ыш саке вуйжым, кодо

Пиалан эрлалан ӱшанен.

Чонлан йӧсӧ пагыт лийме годым

Сценыш лекме кечым шарналтен.

…Салика алят ила селаште,

Лач чурийжым пагыт кудыртен.

Ялна угыч ынде веселаҥе,

Йоҥга тыныс муро шып эрден.

А Эчукшо, шинелян шӱмбелже,

Толын огыл таче мартеат.

Вучат тудым ялже, шочмо велже…

Шӱм йӱлен, шарна Саликажат.

Писатель Юрий Галютинат тидын шотышто шке мутшым каласен:

Театрысе тошкалтыш

Йомакыш наҥгая.

Прожекторын ончалтыш

Эр ӱжара гаяк.

Мый тӱрлӧ-тӱрлӧ т¢сым

Партерыште ужам.

«Балконышко тол, кӱзӧ!» —

Шинчам пӱет мылам.

Мыняре мужыр дене

Эчук ден Салика

Тыш толыныт кастене –

Коклаш йомат докан.

Т¢калтыш вачым ваче.

А шӱм туге кӱлтка…

Эчук улам шке таче,

А тые – Салика.

Журналист Юрий Исаковынат шке Саликаже уло:

Йыдал йол да вынер тувыр –

Чевер ӱдыр Салика.

Ярымалтше ӱпын кудыр,

Нӧлтшӧ оҥ да чон кӱлтка.

Йыдал йол да вынер тувыр –

Кочо ӱдыр п¢рымаш.

Поян олнын сӱан ш¢выр –

Эрык чоным виешлаш.

Ошо-ошо, тувыр ошо.

Илыш шеме гын молан?

Оворкасе тӱрлем шошо –

Ала ылыжше ӱшан?

А ¢шан тул пеледеш гын,

Огеш йӧртӧ йӱр-шолем.

Калык кумыл ден рвезештын,

Волгыдеме Юл кундем.

Тиде сото ӱжараже

Корныш лукто Саликам, —

Теве тулыкын пиалже –

Ола сценыште ужам:

Йыдал йол да вынер тувыр…

Ынде – лачак шарнымаш.

Йоҥгалтеш гын сӱан шӱвыр –

Мужыр таҥлан куанаш.

Шке жапыштыже сценыште Эчукымат, Чопайымат модшо Василий Регеж-Горохов Салика нерген возыдежат кертын огыл:

Салика куаныме олмеш

Шинчав¢дшым ш¢ргыж гыч ¢штеш.

Ала-кушто огыл,

Шке сӱаныштыжак шып шортеш.

Кажне ӱдырын ик пӱрымаш:

Ӱмыраш пелашым вашлияш

Да, ушен кок ш¢мым

Иктыш, куанен, сӧрал илаш.

Саликат чон вургыжын вучен,

Кунам таҥже, кидше гыч кучен,

Пелешта пеш порын:

— Шӱмбелем лият мо, кӧгӧрчен?

Но Эчукшо огыл, чылт вес еҥ

Тудын дек с¢ан ден толылден.

Салика санденак

Шортылда, ш¢м таҥжым шарналтен.

Толын вате колышо пӧръеҥ

Тудым вольыкла налаш шонен:

Чӱчӱжак Акпайлан

Парымже олмеш пуаш келшен.

Ынже к¢рылт ман торгайымаш,

Качыжым шуэныт кӱ коклаш,

Да эше урядник

Куржмо деч шогалын оролаш.

А сӱан лӱшка, мура, шолеш!

Арака эҥерла йогалеш,

Да поянын сийже

Калыкым атмала вӱдылеш.

Саликан шӱм-чонжылан чучеш,

Пуйто сӱан огыл лӱшкалеш,

Пуйто шучко янлык

Элнеттӱр покшелне урмыжеш!

Качыжат ок чуч айдемыла,

Шогылтеш воктене ¢мылла…

Кузе ӱмыр мучко

Тудын дене илалеш, ала?

Салика куаныме олмеш

Шинчав¢дшым шӱргыж гыч ӱштеш.

Ала-кушто огыл,

Шке сӱаныштыжак шып шортеш.

Ну, йӧра, шортде ок лий тудлан:

Колтынешт виеш пуэн марлан.

Молан ончышыжо

Шинчавӱдшым йышт ¢штеш?

Рашак палыс: тиде – лач модмаш,

Пиалан тудлан лийшаш мучаш.

Чын йӧратымашлан

Кынелеш л¢дде Чопай полшаш.

Молан ончышыжо йышт шортеш?..

Литератор Виталий Егоровын ик стихше тугак маналтеш — «Саликалан»:

А удыр-влак каласышт воштыл:

— Ончал мемнан чечен саскам,

Ок кӱл йӧршеш торашке коштмо,

Йӧрате ныжыл Саликам.

А мый, окмак, ончальым тудым,

Лишемым да вуем савем:

— Эсен лий, палыдыме ¢дыр,

Лӱмем – Эчук! – шуем кидем. –

Тендан гын?

— Зина! – шыргыжале.

Мылам каласышт – Салика!

Шыман ончале, вӱр ырале.

Молан тынар шӱмем чӱчка?

— Тендам палем. Те вет филолог?

Лӱмдаже Витя?

— Да, туге.

Улам чонем дене шӱмолог:

Жаплаш айдемым туныктем.

А ынде ӱдыр воштыл колтыш,

Мыят пырля тыршен льыргем

Да, ӱдыръеҥын йӱкшым колын,

Молан шиждегеч чевергем?

Эн «самырыклан» туныктышо Николай Золотарёвын почеламутшым шотлаш лиеш – тудо 2015 ийыште савыкталтын:

Кумло кандашымше ий.

Калык театрыш вашка.

Кумло кандашымше ий.

Театр тич калык тӱшка.

Таче лиешыс премьер –

Визымше кече, вӱдшор.

Залым теменыс шемер,

Пуйто пеледыш мотор.

Теве пондашым коча,

Ӧрын, шыман ниялта.

Теве пеленжак йоча

Совым ваш-ваш пералта.

Морко гыч толын павай,

Тувыр тӱран, маке гай.

Вуйышто весын шарпан –

П¢йто кӱрен агытан.

Улыт шымакш вуянат

Да сорокан, шурканат.

Йолышто – шоло йыдал,

Вате моткочак сӧрал.

— Тыйже кушечын улат,

Палымыла веле коят? –

— А, м¢ндыр огыл Сенькан,

Толынна ялге т¢шкан.

— Ме гын чылан Кужэҥер:

Тумньымучаш, Коҥганур,

Иктыже вел Ломбэҥер,

Молыжо – Кугу Чарнур.

— Чуза, тулаче, тулар,

Почылтын уна чарша!

Шып, ида шурго тунар!

Сценышке калык онча.

Теве мотор Саликам

Пешак налнеже Акпай.

Пеледыш гай Салика

Садак тудлан огеш кай.

Орадеш кодеш вакшоза,

Шоҥго да шучко Кузи.

Ӱдыр чолга Эчуклан

Лектеш уло чон ден марлан.

— Ок к¢л мылам нимоат,

Поян, чапле качетат.

Лийже мылам Эчукем –

Мый чыла ойгым мондем, —

Мурым мура Салика,

Мурым мура куанен.

Шӱмжӧ ласканак к¢лтка –

Ынде вет таҥже пелен.

— Ой, Салика, Саликажат,

Улат мыйын ушыштем.

Шӱмемлан да чонемланже

Улат тые келшыше.

Мыят тыйым йӧратем да,

Тидым тые от шиж мо?

Ончалалам, шупшалалам,

Тылат тыге келша мо?

Мур ден йоҥга Элнетт¢р.

Шокто, шӱвырзӧ, устан!

Мо калыклан тиде йӱр?

Ушо кок таҥым, с¢ан!

Марий кундемыштак шочын-кушшо руш поэт-фронтовик Анатолий Мосунов 1984 ийыште возен, кузе торасе частьыште служитлыше рвезе эн шерге еҥжым, ш¢мбелжым, шарналта:

В незнакомом степном Казахстане

Вспоминал зачастую солдат

Край марийский, где в зимнем тумане

Запоздалый бледнеет закат.

Вспоминал он и летние дали,

Золотые от солнца леса,

И домой его ласково звали

Голубые с улыбкой глаза.

Дни летели, и встреча настала,

Агроном возвратился домой.

Но не дома, а в зрительном зале

Состоялось свиданье с женой.

Вот сидит он и смотрит с волненьем

На колхозных артистов-друзей,

Что сегодня дают представленье

В новом клубе деревни своей.

В песнях – прошлое отчего края,

Грозовые, как дым, облака…

А со сцены к нему, улыбаясь.

Прямо в гриме спешит Салика. 

Айста шоналтена: нине автор-влак шке ш¢мышт да шинчашт дене Саликам могайракым ужыныт? Кызыт мыланна тушкен пуаш тӧчымӧ гайым мо? Нунылан тыгай Салика омешат кончен огыл, шонем. «Тыгай» образ почеламутым возаш нигӧмат таратен огеш сеҥе. Ме умылена: кызыт чыла вереат окса кугу рольым модеш, сандене саде сӱретым кундемнан брендше шотеш пеҥгыдемден кертыт. Векат, тыгак лиеш. Кеч-мо гынат, мый С.Носован «Ала Салика, ала Салика огыл…» манме ойжылан тыгай ешартышым ыштынем: «Тидыже Салика огыл – йӧршынат, нигунарат, низаштат».

Гельсий Зайниев.

Опубликовать в Одноклассники

Добавить комментарий