Туныктышо. Поро да мыланна сайым шонышо айдеме. Арамлан огыл тудо мыланна кокымшо авам алмашта. Кажне ийын Морко кундемыштына эн чолга туныктышо-влакым ойырат, а тидланже лӱмынак профессионал мастарлык конкурсым эртарат. Тений тудо Ӱярня тылзын 12-13 кечылаштыже Морко посёлкысо 6-шо №-ан школышто эртен.
Тушто мастарлыкым 18 туныктышо ончыктен. Конкурс тӱҥалме деч ончыч нунылан поро мутым Морко район администраций вуйлатышын алмаштышыже А.Васильев, образований да самырык-влакын пашашт шотышто пӧлкам вуйлатыше В.Кирчанов ойленыт. Тидын деч вара туныктышо-влак почмо урокым, мастер-классым эртареныт, электрон портфолиошт, тыгак проект пашашт дене палдареныт. Тыге ты гана «Идалыкын туныктышыжо» номинацийыште Унчо школышто руш йылмым да литературым туныктышо Н.Григорьева, «Идалыкын воспитательже» номинацийыште А.Ефимова (Морко посёлкысо 2-шо №-ан йочасадын логопедше), «Марий йылмым эн сайын туныктышо» номинацийыште Е.Григорьева (Шӱргыял школышто марий йылмым да литературым туныктышо), «Шӱм шокшемым йочалан пӧлеклем» номинацийыште Н.Михайлова (Морко посёлкысо 6-шо №-ан школышто йоча-влаклан ешартыш образованийым пуышо туныктышо) сеҥеныт. Сеҥыше да участник-влаклан верысе образований да самырык-влакын пашашт шотышто пӧлкан тӱҥ специалистше С.Александрова дипломым, профсоюз организацийым вуйлатыше В.Фёдоров шергакан пӧлекым да шийвундан ковертым кучыктеныт. Сеҥыше-влак районнан чапшым республик кӱкшытыштӧ аралаш тӱҥалыт. Ме нунылан сеҥымашым тыланена, вет «Марий йылмым эн сайын туныктышо» номинацийыште эн ончылно – мемнан школын туныктышыжо Елена Григорьева. Ме тудын дене кугешнена.
Екатерина Сергеева,
Морко район,
Шӱргыял школ.
Тиде кечылаште Морко районышто веле огыл, уло республик мучко эн виян туныктышо ден воспитатель-влак шкеныштым профессионал мастарлык конкурсын муниципальный этапыштыже тергат. Ушештарена, номинаций-влак тыгай улыт: «Идалыкын туныктышыжо, «Идалыкын воспитательже», «Марий йылмым эн сайын туныктышо» да «Шӱм шокшемым йочалан пӧлеклем». Конкурсын республик кӱкшытан этапше 1 апрельыште тӱҥалеш да 26 апрельыште мучашлалтеш.
Снимкыште (шола гыч пурлашке): «Марий йылмым эн сайын туныктышо» номинацийын участникше-влак: О.Васильева (Морко посёлкысо 6-шо №-ан школ), О.Васильева (Морко посёлкысо 1-ше №-ан школ), Е.Григорьева (Шӱргыял школ), С.Тойбердина (Шеҥше школ), верысе образований да самырык-влакын пашашт шотышто пӧлкан тӱҥ специалистше С.Александрова
