ПАТЫРЛЫК

«Патриот улам, элемым йӧратем», —

– манеш Йошкар-Оласе 3-шо №-ан школын директоржо В.Хайбуллин.

«Негызым – школышто»

Тиде общеобразовательный учреждений пытартыш ийлаште кадет классше-влак дене ойыртемалтеш, а Вадим Александрович шке энтузиазмже, патриотизм кумылжо дене ӱдыр-рвезе-шамыч коклаш лач ты шӱлышым шыҥдараш тырша.

Эн ончыч тидым палемдыман: тыгай кадет школжо (5-11 классла)  республикыштыжат икте гына. Тушко, ойыркалыде, эсогыл районла гычат кумылан йоча-влакым тунемаш налыт. «Российысе кадет братство» мер организацийыш, «Юнармий» военно-патриотический Россий мер толкынын Марий Элысе отделенийышкыже ушненыт.

– Тиде школ эше 3-шо №-ан кадет корпус маналтеш. Шке флагна, эмблемына улыт. Ме тӱрлӧ военно-патриотический клуб, рӱдер, мер организаций, военный училище, вузла, регионысо дивизийын ик частьше, ДОСААФ дене пеҥгыде кылым кучена. Локальный сар-влакын ветеранышт  дене вашлиймашым эртарена. Нуно историйым шке примерышт гоч чын почын пуаш тыршат, – ойла Вадим Александрович. – Ӱдыр-рвезе-влак школ гычак шочмо элым йӧраташ тунемышт манын шонена. Шочмо кундемын да  Российын историйыштым, культурым, йӱлам, тукымвожыштым келгын палышаш улыт. Тыге элнан ӱшанле айдемыже лийын кушкыт. Школ программыш лӱмынак арняш ик гана ОВС (Вооружённый Вийын негызше) урокым пуртымо. Тыгак ОБЖ, бальный куштымаш урокла эртаралтыт. Тудыжым профессионал, «Марий Эл» ансамбльын участницыже,  туныкта. Рвезе-влак патырлыкышт дене веле огыл, культурышт денат ойыртемалтшаш улыт.

Ӱмаште республикысе «Школын туныктымо да воспитатлыме  системыжым уэмден толмо условийыште школьникын личность семын вияҥмаштыже да шуаралтмаштыже тӱҥ негыз – гражданско-патриотический воспитаний» инновационный программыш ушненна.

Паша арам ок йом

Кадет класслаште тунемше-влак тӱрлӧ кӱкшытан мероприятийлаште, таҥасымашлаште участвоватлат. Олаштат, регионыштат усталыкышт да чолгалыкышт дене ойыртемалтыт. Мутлан, 23 февральлан торжественный митингым почмаште, Афганистан гыч совет войскам лукмылан 30 ий темме мероприятийым (15 февраль) тӱҥалмаште ты школын кадетше-влак лийыныт. Тунемше-шамыч кокла гыч икмынярышт Анапыш Россий кўкшытан военно-спортивный лагерьыш миеныт. Нижегородский областьыште «Гвардеец-1» ОСОЛ-ышто (оборонно-спортивный, оздоровительный лагерь) 10-11 классыште тунемше икмыняр  рвезе «армейский» школым эртен. Тыгак 2016 ийыште ты школын кадетше-шамыч Самарыш юбилейный историко-патриотический Шарнымаш парадыш миеныт. Россий кӱкшытан «Орлёнок» военно-спортивный модмаште участвоватленыт. «Россия – наша держава», «Салют победы» акцийыш, «Наш дом – Россия» фестивальыш ушнымыштым поснак палемдыман.

– Паша арам ок лий: Даниил Абросимов Санкт-Петербургысо военно-морской вузыш тунемаш пурен. Морко районысо Октябрьский посёлко гыч Алексей Иванов Серпуховысо Петр Великий лӱмеш РВСН военный академийыште шинчымашыжым келгемда. Шукерте огыл лач Алексей военно-патриотитечкий сынан ик мероприятийыш толын, моло тунемшылан шочмо элым йєратыме шўлышеш воспитатлалтмын кӱлешлыкше, тудын пайдаже нерген каласкален. А выпускник-влак кокла гыч военный вузыш ик-кок еҥ тунемаш пура гынат мыланна – куан. Тугеже тыршымына арам ок йом, результат уло, – ойла школ директор. –  Адакшым военный корным огыт ойыро гынат, школышто налме шинчымашышт садак илышыштышт шуко жаплан кодеш. Саркурал, «Шарнымаш вахте» нерген, военный дисциплиным, икманаш, салтак илышын негызшым палаш тӱҥалыт. Ме тыште нунылан личность семын вияҥашышт чыла йӧным ышташ тыршена. Йошкар-Оласе Марково шӱгарыште Кугу Отечественный сарын участникше-влакын шӱгарыштым эрыктена.

Тыгак кажне ийын военно-полевой сборыш лектына. Тушто кадет-влак  икмыняр кечылан салтак илышыш логалыт. Тӱрлӧ вашлиймашыже, мутат уке, моткоч кугу пайдам пуа, сай шарнымашым кода. Мутлан, икана Михаил Калашников денат вашлийын, лекше йодышым пуэн рашемдаш йєн лийын.

Школышто кажне ийын кеҥеж каникул жапыште военно-спортивный лагерь пашам ышта. Тидат ӱдыр-рвезе-влаклан кӱлешан.

Салтак илыш

Самырык тукымым патриотизм шӱлышеш воспитатлымаште ты школын директоржо В.Хайбуллиным шкенжымак кугу пример семын палемдыман. Шочынжо тудо Челябинск олаште. Пӱрымаш рвезым Марий кундемыш конден. Марий кугыжаныш университетыште историй факультетым тунем лектын, моло рвезе семынак армийыште порысшым шуктен. ВДВ-ште служитлыме жапым (1985-1987 ийла) илышыштыже моткоч кугу опытым  налме, пєръеҥ семын пеҥгыдемме пагыт семын палемда.

– Салтак илышем Прибалтикыште, юж-десант войскаште эртен. Службо патыр лияш, ыштыме пашалан шкеак мутым кучаш, тӱҥалме сомыл верч вуйын шогаш туныкта. Погонан вургемым чиен шогалме икымше кече гычак шкем вес семын, ответственностьым шижын кучаш тӱҥалат. Кеч школышто НВП-м (начальный  военный подготовкым) тунемынна, ВТП-м (военно-технический подготовкым) эртенна,  мутат уке, армийыште дисциплине пеҥгыдемеш, режимым шотыш налын, жапым чын кучылтын, пайдалын эртараш тунемат. Армийым личность семын формироватлалтмаште ик общественный институт семын палемдыман. Сандене самырык тукым службо деч лӱдшаш огыл. Мыйын гын лач єрдыж кундемыште патриотизм шўлыш чотрак авалтен, – ойла таче кечылан Марий Эл образованийын заслуженный пашаеҥже, РФ общий образованийын почётан пашаеҥже В.Хайбуллин.

Армий… Марий рвезылан Нагорный Карабахыштат, Сумгаитыштат лияш, локальный сарын тул-вӱд воштшат лекташ логалын. «За боевые заслуги» да тыгак икмыняр юбилейный медаль-влак дене палемдалтын. Но тидын нерген тудо ойлаш ок йӧрате.

Уло кумылын – мер пашаш

Армий деч вара Вадим Александрович Йошкар-Оласе  комсомол организацийыш, мер пашаш кумылын ушнен. 1980 ийлаште комсомол горкомын секретарьже сомылым шуктен. Чўчкыдынак «Шарнымаш вахтыште» лийын. 1990 ийыште Ижевскыште всесоюзный слётышко регионна гыч лач шкетын миен. Варажым чолга, чытамсыр рвезе оборонный, тыгак спортивно-оздоровительный лагерьлаште пашам ыштен. Тыгодым верысе йӱлам, историйым арален кодымашке кумылын ушнен. Мер пашаште  «шолын»,  тыгодым ик жап предприниматель сомылымат шуктен. Кокымшо кўшыл образованийже дене чоҥышо. А вара?..

Искусство моторлык гыч тӱҥалеш

Вуйлатыше чыла шотыштат мутым кучышаш

В.Хайбуллин 25 ий директор сомылым шукта. Республикысе Национальный президент школ интернатымат ятыр ий вуйлатен. Лач тудын тӱҥалтышыж дене чыла шотыштат тачысе саманлан келшыше у президент школым чоҥаш негызым пыштеныт. Кеч тидлан тудлан чот «логалын», но чын патриот семын тӱҥалме пашам мучаш мартеак шукташ  тыршен. Теве кушто тудын кокымшо образованийым налмыже кӱлеш лийын. «Искусство моторлык гыч тӱҥалшаш. Марий йылме, шочмо кундем шотышто патриотизм шўлыш лач ты жапыште мыйым чотрак авалтен. Чыла тиде аралалтын кодшаш, шоненам тунам», – манеш шкеже.

Пашаже, тыршымыже арам лийын огытыл.

Айдеме лийын кодман…

Сай кӱкшытыш шуаш кажнын шке корныжо, а корно моткоч кумда, – манеш Вадим Александрович. Конешне, кажне айдеме ала-мо деч лӱдеш, а Вадим Александрович шке шинчымашым, моштымашым, вий-куатым мучаш марте да кӱлеш семын кучылташ кӱлеш, илышыште оккӱлыш савырныме ок шу манын пеҥгыдемда.

Кажне айдеме йоча годсо шонымашым илышыш шыҥдараш тырша, а тудо изинекак техникылан шӱман, автомобильымат вашталтылаш тырша. Пєръеҥ пєртым чоҥышаш, а тудо эсогыл – кумытым. Жапше годым «Эрвел» ООО фирмыште тыршен, тидат  кугу кӱкшыт. Илышыште эн тӱҥлан йӧратымашым шотла, а тудыжо – тӱрлӧ шӧрынан. Пӱртӱс, мланде деке лишкырак лийман, манеш туныктышо. Шкетынак эргым ончен-куштен, йол ӱмбаке шогалтен, кызыт кок уныкаже куандара. Физкультур ден спортланат шӱман. Яра жапыштыже телым ече дене мунчалта гын, кеҥежым велосипед дене кудалыштеш. Тыгак овчарке пийым, пырысым ашна. А могай айдеме кушкыл, пеледыш деч посна чыта? В.Хайбуллинат жапше годым тӱрлӧ сорт пеледышым куштен, поснак – розам. Тудо пӱртӱсын сєраллыкшым аклыше тыгак кочкаш шолташат мастар. Ты аланыштат шкешотан творчество лийшаш манын палемда тудо. Марий кочкышымат ямдылаш ок ӧркане. А шканже илышыште эн кӱлешан ой-каҥашыже тудлан родо-тукымжо деч лийын. Могай? Чыла шотыштат айдеме лийын кодаш. Вадим Александрович – тукымыштыжо латнылымше туныктышо. Чыла тиде ойырен налме корныштыжо пеҥгыдын шогымыжым, кушкын шогышо дыр-рвезе-влакым чын корныш шогалтыме шотышто сай туныктышо улмыжым ончыкта.

Е.Эшкинина.

Опубликовать в Одноклассники

Добавить комментарий