Марий Элын калык поэтше Геннадий Оярын почеламут корнылаже жаплан келшыше. Тӱнямбал кӱкшытыштӧ чапланыше землякна Йыван Кырлан шочмыжлан мартыште 110 ий темын. Тиде дате республикыштына икмыняр мероприятий дене палемдалт кодеш. Иктыже эртыше каныш кечылаште поэт да киноактерын шочмо Марисола кундемыштыже лийын. Тиде Йыван Кырлам шарныме лӱмеш ече дене таҥасымаш. 21 мартыште В.Х.Колумб лӱмеш йоча да самырык-влаклан республикански библиотекыште «Кырла – калык шӱмыштӧ» шарнымаш кас эрта. Тукшо Марисола школышто Йыван Кырлан тоштержылан тӱҥалтышым ыштыше, «Йыван Кырлан пӧртылмыжӧ» поэмын автожо туныктышо-ветеран З.Ермакова дене вашлиймаш лиеш.
28 мартыште М.Шкетан лӱмеш Марий национальный драме театрыште лиеш. Шернур район администраций ден Йошкар-Оласе Шернур землячестве (вуйлатышыже Е.Пайдышев) мер калыкым «Муралтем мый йывыртен» поро кумылым ончыктышо концертыш вуча. Кумшыжо, «Кырла лудмаш» VI республиканский научно-практический конференций, 29 мартыште Шернур поселкышто лиеш. Тудым МарНИИЯЛИ Марий Элын Культур, печать да калык-влакын пашашт шотышто министерствыже полшымо дене эртара.
Конференцийлан тӱҥалтышым 2010 ийыште землякнан курымаш лӱмгечыж годым ыштеныт. Тунамак Йошкар-Оласе кӱртньыгорно воктене тудлан чапкӱм торжественно почыныт. Шонымашым мер калык лӱм дене Мер Каҥаш (вуйлатыше Л.Яковлева) темлен да мучаш марте шуктен. Таче ынде вокзалыште кажне пассажирым Йыван Кырла – Мустафа – дрезине дене кудалшыжла вашлиеш. Кажне ийын, Марий талешке кечын эрдене, шернур марий, моло мер еҥ-влак тушко миен, вуйым сават, сортам тӱктат.
2009 ийыштак, Йыван Кырлан колмо кечынже, 3 июльышто, шочмо ялыштыже, Шернур район Купсолаште, шарнымаш кӱм пыштеныт. Тыгак Марисола школ ончылно Йыван Кырлан бюстшо уло.
Теве ынде у шонымашым илышыш пурташ лийме – Шернур посёлкышто Йыван Кырлалан чапкӱм шогалташ. Культур пӧрт пелен лӱмлӧ марий-влак Александр Конаков ден Шабдар Осыпын бюстышт улыт. Тудо тураштак Йыван Кырланым шогалтен, шкешотан шарнымаш комплексым ышташ лиеш. Шонымашым илышыш пуртышашын тӱҥалтышыже — «Муралтем мый йывыртен» концерт. Билетым ужалыме окса ты поро пашалан ойыралтеш.
Программыште – Йыван Кырлан илыш корныжо, творчествыже, да таче тудым кузерак шарнен илыме нерген видеопрезентаций, Шернур кундемыште шочын-кушшо лӱмлӧ артист-влак Маргарита Медикова, Виталий Шапкин, Нина Макарова, Александр Бирюков, Алина Егошина, Сергей Мамаев, Любовь Купсольцева, Эльвира Попова, Марина Воронцова, Игорь Антропов, Ирина Якаева, Вячеслав Дудин, Александр Иванов, тыгак Иван Смирнов, Раисия Данилова, «Саскавий» ӱдырамаш вокал, (Марисола культур пӧрт), «Грация» (Шернур гыч тунемше-влак), «Салика» (МарГУ), «Ныжыл сем» фольклор (Йошкар-Ола) ансамбль-влак ушнат. Концерт М.Шкетан лӱмеш Марий национальный драме театрыште 18 шагатлан тӱҥалеш. Поро пашаш ушнан ӱжына.
С.Пехметова.
М.Скобелевын фотожо.
