М.Шкетан лӱмеш Марий национальный драме театр вашке черетан тургымжым мучашла. Туге гынат тушто паша ок лыплане, коллектив у спектакль-влакым сценыш лукташ палемда. Адакшым тений театр 100 ияш лӱмгечыжым пайремла. Тудо 29 ноябрьыште лиеш. Тӱрлӧ вашталтыш, премьер да моло нерген театрын художественный вуйлатышыже Василий Пектеев, тӱҥ режиссёржо Роман Алексеев да режиссёр Василий Домрачев кодшо кечылаште эртыше пресс-конференцийыште каласкалышт.
— Театрнан лӱмгечыжлан ямдылалтме паша шукертак тӱҥалын. Кугу паша мемнам кеҥежым вуча, тунам сценым, залым олмыктышаш улыт, — ойла В.Пектеев. — А ик эн тӱҥ пашалан, мутат уке, репертуарым пойдарымым шотлыман.
23 мартыште С.Николаевын «Салика» пьесыж почеш шындыме спектакль деч вара театрын тӱҥ режиссёржо Роман Алексеев марий йомак-влак негызеш ямыдылыме «Нӧнчык патыр» постановкым сценыш лукшаш. Либреттон авторжо — Н.Кузьминых.
А апрельыште театр коллектив эше кум у спектакльлан ямдылалташ тӱҥалеш. «Мланде йымал пеледыш» — венгр драматург Чаба Секейын пьесыже. Тудым сценыш режиссёр Роман Алексеев луктеш. 7 сентябрьыште марий драматург Ю.Байгузан шочмыжлан 60 ий темеш. Тудым шарныме лӱмеш «Шӧртньӧ лудо» пьесыж почеш тыгаяк лӱман спектакльым В.Пектеев шында. Тиде жапыштак режиссёр Василий Домрачев белорус драматург В.Ткачевын пьесыж почеш «Уло яллан ик Йогор» спектакльым ямдылаш тӱҥалеш.
— Тений Йыван Кырлан шочмыжлан — 110, а Константин Коршуновын шочмыжлан — 90 ий теме, — ойла Василий Александрович. — Ончыч театрыште Йыван Кырла нерген спектакль лийын, кызыт уке. А тыгай еҥын лӱмжӧ дене кылдалтше спектакль Шкетан лӱмеш театрыште лийшаш, сандене шыжылан тудым ямдылаш тӱҥалына. Тыгак Константин Коршуновын «Кӱдырчан ӱжара» пьесыж почеш шындыме сценыш лукташ шонена.
Ноябрь тылзыште М.Шкетан лӱмеш театрыште Национальный драматургий фестиваль лийшаш. Тушко Марий самырык, Курыкмарий театр-влак ушнаш кумылым ончыктеныт. Тыгак калмык, татар, чуваш театр гычат толшаш улыт.
Пошкудо кундемыш кая
2 апрельыште Марий драме театрын артистше-влак Пошкырт, Свердловск кундемлаш гастроль дене каят.
Тушто илыше-влаклан нуно «Человек из Подольска» ден «Ӱжында?» спектакль-влакым ончыктат.
А.Байкова
В.Тумбаевын фотожо
