Кодшо кечылаште У Торъял районышто «Первый май» колхозын ончычсо вуйлатышыже Н.И.Поляковым шарныме лӱмеш тудын призше верч ече дене таҥасымаш эртен. Тушко ты кундем гыч веле огыл, моло районла гычат чылаже 130 утла спортсмен ушнен.
Таҥасымаш деч ончыч нунылан сугынь мутым да сеҥаш тыланымашым Николай Ивановичын лишыл еҥже-влак, «Первый май» озанлыкын кызытсе вуйлатышыже А.Новиков, район администраций вуйлатышын алмаштышыже Т.Таныгина, тӱвыра, физкультур да спорт отдел вуйлатыше Р.Садовин ойленыт.
Тылеч вара тӱрлӧ тӱшка участник-влак стартыш лектыныт.
Мутлан, эн изи ийготан-влак тӱкаште, 11-12 ияш рвезе-шамыч коклаште, Советский район Кадам гыч А.Гусев эн писе лийын.
Тыгаяк ийготан ӱдыр-шамыч коклаште Тошто Торъял школын тунемшыже А.Яндыганова финишыш эн ончыч толын.
18-35 ияш да 60 ий деч кугурак ийготан ӱдыр ден ӱдырамаш-влак коклаште У Торъял районысо Тушнур ял гыч Н.Соболева ден У Торъял гыч Р.Смирнова икымше верыш лектыныт.
Эн шуко еҥан тӱшкаште, 15-16 ияш рвезе-шамыч коклаште, эн сай жапым Советский районысо Ӱшнур гыч К.Прозоров ончыктен.
50-59 ияш пӧръеҥ-влак коклаште Шернур гыч Г.Макаров эн писе лийын.
А теве ечызе-«суперветеран-влак» коклаште Тошто Торъял гыч А. Никитин алят эн писе улмыжым ончыктен.
Тыгак школ-влак коклаште сеҥыше-влакым палемденыт. Командный первенствыште куснылшо кубокым Советский районысо Кукмарий да Тошто Торъял школын икымше командыжлан кучыктеныт.
Таҥасымаш мучашлалтмеке, Н.Поляковын ӱдыржӧ, Светлана Николаевна, ден «Первый Май» колхозын инженер-чоҥышыжо Н.Смородинов сеҥыше-влаклан Чап грамотым, медальым, кубокым да шергакан пӧлекым кучыктеныт.
Л.Камалетдинова.
