Мыйын семынак ялыште илыше иктаж еҥ деч вуем йӱдшӧ-кечыже гаяк пудыратылше ик йодышем рашемдынем ыле: шӱкшакым погымо да лукмо услугылан квитанций тыландат толын мо? Тушто ончыктымо суммым тӱрыснек тӱленда? А эн тӱҥжӧ – ялыштыда шӱкшакым оптымо контейнер уло мо?
Р.Сергеева.
Волжский район.
Шӱк реформым илышыш пуртымо дене редакцийышкына пеҥгыде коммунал торым погымо да лукмо шотышто кече еда йыҥгыртат, поснак – ялысе-влак. Умылыдымашым лукшо йодыш шагал огыл, нуным верлаште тӱрлын рашемдат. Мутлан, Звенигово районысо Эҥервож ялыште илыше Алевтина Семёнова тыге ыштен:
– Арня тӱҥалтыште электротул дене пайдаланымылан квитанцийым пуэдаш кондышт, тудын дене пырля эше шӱкшакым погымылан да лукмылан счётым пуышт. Мемнан кундемыште, Эҥервож, Янашплак, Ташнур, Ошытъял, Пӱмъял, Кӱшнур яллаште, шӱкшакым погымо контейнер уке да лийынжат огыл! Тугеже молан тӱлаш? Ме пропискыште кудытын улына, 515 теҥгем южыш кудалташ мо? Манмыла, тулым шке ӱмбакем нальым: ончыч Красногорский ола шотан администрацийыш, вара Звенигово район администрацийыш, тыгак «Благоустройство» ООО-ш йыҥгыртышым да можым-кузежым радамлын каласкалышым. Икмыняр жап гыч вашмутым нальым: квитанцийым калыклан пуэдаш огыл, шӱкшакым погымо да лукмо услугым пуымо шотышто системым шотыш конден шуктымеш, иктаж май марте, нимом тӱлаш огыл.
М.ИВАНОВА
