Билетым вес семынат налаш лиеш?
Ола воктенысе илыме кундемлашке кудалыштше пассажир поездлашке билетым «РЖД Пассажирам» мобильный приложений полшымо дене налаш лийме нерген колынам. Тиде чынак мо?
Н.Антонова.
Волжский район.
Чын, «Содружество» АО-н ола воктенысе илыме кундемлашке кудалыштше поездлашкыже билетым iOS да Android смартфонан-влак «РЖД Пассажирам» приложений полшымо дене налын кертыт. Тиде билет экраныште QR-код дене палемдалтеш. Тудым турникетын тӱжвал ридерышкыже пыштыман. Тыгак билетым электрон почтыш колташ да вараже кагазыш печатлаш лиеш.
Кызыт «РЖД Пассажирам» мобильный приложений гоч «Содружество» АО-н поездлашкыже тӱлыман чыла билет ужалалтеш, тидлан ешартыш окса огеш налалт. Билетым поездын тарванымыж деч 10 сутка ончыч налаш лиеш.
«РЖД Пассажирам» официальный мобильный приложенийым онлайн-кевыт гыч кӱсынлыман.
«РЖД Пассажирам» приложений полшымо дене билетым тыгак торашке кудалыштше поездлашке комиссий деч посна налаш, багаж ден мӧҥгысӧ янлыкым наҥгайыме документым оформитлаш, расписанийым рашемдаш лиеш.
М.ИВАНОВА.
