СПОРТ

Ӱдырамаш-влакат футболла модыт

Кужэҥер районысо Старсела ялыште 8 мартлан пӧлеклалтше мини-футбол дене ӱдырамаш команде-влак коклаште ынде кумшо ий почела таҥасымаш лийын. Турнирым «Ленинец» футбол командын ветеранже-влак шке вийышт дене эртарат. Теният тудо ты кундемысе ял-влакын командыштым чумырен.

Ӱдырамаш-влак шкештак тудым эртараш темленыт. Молан манаш гын, «Ленинец» пӧръеҥ-влакын командышт район кӱшытыштӧ веле огыл, республикыштат шукертак чаплана. Кызыт командым Константин Петухов вуйлата. Ӱдырамаш мини-футбол верысе калыкын ик эн йӧратыме да вучымо мероприятийышкышт савырнен. Пошкудо ялла гычат команде-влак модаш толыт. «Калыклан келша гын, тыгай мероприятийым эртарыманак»,- ойла турнирын ик организаторжо.

Кодшо ийын Токтайбеляк, Тумньымучаш гыч толыныт ыле гын, тений Токтайбеляк гыч команде лийын. А пӧръеҥ-влак ты кечын шокшо кочкышым — шурпам, чайым шолтен ямдыленыт. Ойыртемалтше команде-влаклан грамотым, пӧлекым шкак налыныт.  

Тений ныл команде участвоватлен: Старсела — Лопсолан, Кокшародын, Нурсолан да Токтайбелякын. Круговой системе дене модыныт. Икымше верыш Старсела-Лопсола ял-влакын командышт лектын. Кокымшо Токтайбеляк, кумшо Кокшародо да нылымше Нурсола  гыч ӱдырамаш-шамыч лийыныт.  

 Мини-футболла модаш Старсела ял покшелне лӱмын площадкым келыштареныт. Капкамат пӧръеҥ-влак шкак ыштеныт. Тушто мини-футбол дене район кӱкшытан турнирымат эртарат. Теве 17 мартыште  тушто телымсе футбол сезоным мучашлаш тӱҥалыт. Верысе-влак Шернур командым унала ӱжыныт.

Старсела тӱвыра пӧртын пашаеҥже-шамычат (тудым Г.Жилкина вуйлата.) чолгалыкым ончыктеныт, концерт программым ямдыленыт. А кастенже марий эстрадын шӱдыржӧ-шамыч самырык-влаклан каныме касым эртареныт. Рушарнянже футболлан келыштарыме площадкыштак Ӱярня арням ужатымылан пӧлеклалтше программе эртен. Мурен-куштеныт веле огыл, йӱла дене кылдалтше тӱрлӧ модыш дене модыныт. Толшо-влакым мелна, кӱктымӧ шыл кочкыш дене сийленыт.

 С.Носова

 Фотом «Ленинец» командын архивше гыч налме.

Опубликовать в Одноклассники

Добавить комментарий