Февраль мучаште Советский посёлкышто Мер Каҥашын вуйвержын погынымашыже эртен. Мер ушемын еҥже-влак районысо активын Луымшо марий калык погынын резолюцийжым шуктымо пашажым иктешленыт.
Тудым сайлан шотлымо. Докладым И.И.Пьянкова ыштен. Кугу вер тӱҥ шотышто шочмо йылмым арален кодымо дене кылдалтше йодышлан ойыралтын. Советский кундемысе школлаште марий йылмым кугыжаныш йылме семын тунеммым араленак кодаш тыршаш кӱлмым палемдыме. Тидлан образований пӧлкаланат кугу тӱткышым ойырыман.
Кокымшо йодыш 2020 ийыште Марий калык погыным эртараш ямдылалтме дене кылдалтын. Верлаште марий мер толкын пашам вияҥден колтыман. Чолга еҥ-влак ты шотышто калык дене пашам сайрак ыштышаш, вашлиймашым эртарышаш улыт. Поснак марий самырык тукымым ушышо, коклаштышт кылым ышташ полшышо мероприятий-влакым эртарымылан верым ойырыман, иктешленыт погынымаште. А ты шотышто Россий кӱкшытан тыгай мероприятий-влакым эртарыме опытлан эҥерташ уто огыл.
Мер Каҥашын вуйверже тенийлан ыштышаш паша радамымат пеҥгыдемден. А ыштышашыже ятыр. Эшежым вес ийын республикын 100 ияш лӱмгечыжым палемдена. А тудлан ямдылалтме паша ончылгоч ыштыме план дене шукталтеш. Мутлан, тений апрельыште Марий Элысе олала ден райрӱдылаште марий шӱлышым арален кодышаш темылан пӧлеклалтше конференций эртышаш. Ноябрьыште Морко районысо Унчо селаште «Унчо — финн-угор тӱнян тӱвыра рӱдӧ верже» кугу форум палемдалтын. Марий самырык тукымын латикымше слётшат тений туштак эртышаш. Марий учебник-влакым лукмо пашамат саемден да вияҥден колтыман. Мер Каҥашын Волжский, Кужэҥер, Шернур, Марий Турек районласе активыштын пашаштым ончен лекман. Мер Каҥашын сайтшымат оҥайракым, кумылым савырышым ыштыман. Киров, Пошкырт, Свердловск велне илыше марий-влакын мер пашаштлан эҥертыш лийман, сай тӱҥалтышыштлан полшыман. Марий онычылъеҥ-влаклан шарнымаш оҥам почмо пашамат шуйыман. Тӱрлӧ вере ял пайремым, искусство, тӱвыра, калык йӱла дене кылдалтше мероприятий-влакым эртарымашке ушныманак. Тений П.С.Тойдемарын шочмыжлан 120 ий темеш. Тудын лӱмеш шочмо Морко районыштыжо «Мӱндыр мӧролык гоч Кожлаерыш» акций эртышаш.
Киров областьысе Кикнур посёлкышто Марий тӱвыра кечым эртараш палемдыме. Ты кундемысе марий-влак Мер Каҥашын региональный конференцийышкышт погынышаш улыт. Пошкырт велне, олмыктен пытарымеке, Марий историй да тӱвыра рӱдерым почаш шонат. Тыгак Пошкырт велысе Калтаса кундемыште илыше-влак «Марий сурт-пече» конкурсым, Киров велысе-влак «Сай мотор Уржум» фестивальым, «У кинде» пайремым да моло оҥай мероприятийым эртараш лийыныт. Нуныланат полшыман. Тидын дене пырля идалык, кечышот, йӱла дене кылдалтше мероприятий-влакат ситышын улыт.
Икманаш, Мер Каҥашын чолга еҥже-шамычлан эшеат чолгарак лийман. Республикын юбилейжым палемдыме идалык калыкнан илышыжым тӱрлӧ сферыште мыняр-гынат саемдаш, пойдараш полшышо шуко сай лектышым кондышаш.
С.Носова
