«Семёновский» племзаводын «Семол» кубокшо верч хоккей дене турнирыште икмыняр команде таҥасен.
Такшым Кузнецовысо хоккей коробкаште чӱчкыдынак могай-гынат таҥасымаш эрта.
Участник ден уна-влакым ял шотан администраций вуйлатыше М.Прокудина, Племзаводын генеральный директоржо А.Козырев саламленыт.
Ий ӱмбалне ончыч «Спутник» ден «Рубин» вашлийыныт. Тӱҥалтыште вий иктӧр лийме гай койын гын, матч мучашлан «Спутник» 5:1 счёт дене ончыко лектын. Кокымшо матчыште оза-влак («Молодость») Параньга гыч «Виртуоз» командым 5:4 счёт дене сеҥеныт.
Икымше верыш «Молодость», кокымшыш «Спутник», кумшо верыш «Рубин» команде-влак лектыныт.
Турнир деч вара школ столовыйышто чылаштым шокшо кочкыш дене сийленыт. Кажне команде гыч эн тале модшым посна палемденыт, сеҥыше ден призёр-влаклан медаль, диплом деч посна шарнымашан чапле пєлекым кучыктеныт.
Е.Эшкинина.