Ӱдырамаш-влакын тӱнямбал кечышт вашеш 6 мартыште Йошкар-Олаште Деловой ӱдырамаш-влакын III республиканский форумышт эртыш. Тиде гана чолга еҥ-влак республикысе курчак театрыште чумыргеныт ыле.
Мероприятий тӱҥалмешке, погынышо-шамыч «Сделано женщиной – сделано душой» ончер дене палыме лийын кертыныт. А тушкыжо ӱдырамаш-влак мом гына конден огытыл: шке кид дене ыштыме пеледышым, изи да кугу курчакым, кӧржым, кулоным, моло оҥ й настам, шун гыч ненчыме сӧрастарыш ден ате-ӱзгарым, пу гыч пӱчкедыме модышым, кӱэштме когыльым… Чылажым каласенат от пытаре. Тидым да ятыр молым аклаш веле огыл, тыгак шкан налашат йӧн пуалтын. А южо предприятий, фирме ден посна еҥ-влак мом гына тамлен ончаш темлен огытыл?! Тӱрлӧ сорт мӱйжӧ, пергаже, коктейльже, кофеже, тортшо, мармеладше…
Сату дене пырля тӱрлӧ услугым темлыше-шамычат улыт ыле. Мутлан, ик вере, дерматоскопийым эрташ (шочмо палын тазалыклан лӱдыкшӧ улмыжым-укежым рашемдымаш – авт.) йӧн пуалтын. Вес вере тазалык могай улмо шотышто диагностикым эрташ возалташ темленыт, кумшо вере астролог экспресс-консультацийым эртарен… Тыгак флористике, парикмахер мастарлык, ошма графике, социальный куштымаш, фейс-фитнес дене мастер-класс-влак лийыныт.
Выставкым да «Марий Элын бренд-влак картше» экспозицийым Марий Элын правительстве еҥже ден уна-влакат ончен савырнышт. Южо тураштыже кужунракак кучалтыч – тугеже нунылан ончерыште темлыме паша-влак келшеныт.
Лу шагат эрталтымеке, форум тӱҥале. Уке, мутланымаш гыч огыл. Ойыртемалтшын. Залыште тул йӧрталте. Сценыште пеле пычкемыш лие. Теве скрипка да фортепиано дене шыпракын гына шокташ тӱҥальыч. Тиде ныжыл сем коклаште икте почеш вес почеламутым лудыч. А ты жапыште экраныште «Ӱдырамашын илышыж гыч ик кече» ошма шоум ончыктышт. Погынышо-влакын шинча ончылныштак эркын-эркын кугу сӱрет шочо. Тушто иктаж 50 ийым эрталтыше ӱдырамаш пуйто воштончышыш онча да тушто шкенжым иктаж 18-20 ияшым ужеш. Такшым илышыште тыгак огыл мо? Ийгот погына, тӱжвал сын вашталтеш, чурийым куптыр авалта гынат, шканнаже ме самырык гаяк чучына, чонна дене эре пуйто 18 ияш кодына. Мом ойлаш, пӧръеҥ-шамычат тыгаяк улыт…
Изи ӱдыр-влакын куштымышт деч вара сценыш форумын организаторжо, Марий Эл Республикын деловой ӱдырамашыже-влакын ушемыштым вуйлатыше Оксана Татаринова лекте да погынышо-влакым ты мероприятийыш чумыргымо, тыгак шушаш 8 Март пайрем дене саламлыш.
А вара мутым Марий Эл вуйлатыше Александр Евстифеев нале. Уке, тудо сценыш ыш лек, а ойыртемалтшын саламлыш. Кузе Россий Президент-влак У ий пайрем дене калыкым саламлат, тудат тыгак – экран гоч — видео-обращенийым ыштыш. Тидын дене теве мом ончыктыш: шкеже толаш огеш ярсе гынат, ӱдырамаш-влак нерген монден огыл, нуным пагала да акла.
Тылеч вара Марий Эл правительстве председательын икымше алмаштышыже Михаил Васютин саламлыме мутым веле огыл ойлыш, тыгак республикын правительствыж ден Марий Эл Республикын деловой ӱдырамашыже-влак ушемын ончыкыжым ваш келшен пашам ыштышашышт нерген Оксана Татаринова дене коктын ойпидышыш кидпалым пыштышт.
Умбакыже погынышо-влак ончылно Марий Элын профсоюз организацийышт-влак ушем председатель О.Цветкова, республикын молодежный политике, спорт да туризм министр Л.Батюкова, моло ойлышт. Кутырымым гына эре колыштын, йокрок ынже лий манын, нунын саламлымышт коклаште «Ола» ден «Шошо» модо коллекцийым ончыктышт.
Официальный ужаш деч вара республикын правительствыжын еҥже-влак форумын чолга ӱдырамашыже-шамыч дене пырля чайым йӱшыла, ӱдырамаш предпринимательствым ончыкыжым кузе эшеат вияҥдаш лийме нерген мутланышт.
Кечывал деч вара тӱрлӧ теме дене мутланымаш-влак тӱҥальыч. Тений эртыше форумын темыже «Ӱдырамаш-бренд» маналтын. Сандене мутланымашат тидын йырак эртыш. Теме-влак, мутлан, тыгай улыт ыле: «Личный бренд. Шке лӱмнер дене кузе шке пашам чоҥаш?», «Шке отрасльыште спикер лияш молан тыге чот кӱлешан?», «Ӱдырамаш-предпринимательлан кугыжаныш кузе полшен кертеш?», «Мотор капкылым ыштыме 7 секрет», «Регионысо туризмым национальный бренд-влак гоч вияҥдымаш»… Шкеат умылышда: палемден кодымо теме-влак гочат раш: ӱдырамаш-влак моткочак кӱлешан йодышым тарватеныт. Арам огыл ойлышо-шамыч коклаште Деловой ӱдырамаш-влак ушем, частный йочасад, йоча модмо клуб, путешествий агентстве вуйлатыше, банк управляющий, моло улыт ыле. Мо оҥайже, чыла тиде ӱдырамаш-шамыч лийыныт: вуйлатыше, амалкалче, кучем органлаште тыршыше… Шукынжо шке пашашт, кӱкшытыш кузе шумышт нерген каласкаленыт, опытышт дене палдареныт. Тематический площадкылаште республикын министрже-влакат выступатленыт да форумын участницыже-влак дене кутыреныт.
Мутланымаш деч вара погынышо-влакым форумын резолюцийже дене палдарышт. Пытартышлан кодшо ийысе семынак ӱдырамаш-шамычым чапле концерт дене куандарен, мӧҥгышкышт ужатышт.
Форумын организаторжын мутшо почеш, ӱмаште эртыше форум деч вара республикыште шагал огыл мероприятий эртаралтын, ятыр паша ышталтын. Тугеже тенийысе деч варат тышке чумыргышо, поснак ончер ден экспозицийлашке ушнышо, тыгак тыглай участник семын веле толшо ӱдырамаш-влакын илышыштат кугу вашталтыш лиеш манын каласаш лиеш.
Любовь Камалетдинова.
М.Скобелевын фотожо.
