Кодшо кечылаште телевизор дене апрельыште пенсийым кӱзыктымӧ нерген ойлымым кольым. Каласыза, пожалуйста, пенсийым чынак кӱзыктат мо?
О.Васильева.
Морко район.
Йодышлан Россий Пенсий фондын Марий Элысе пӧлкажын пресс-службыжым вуйлатыше Н.Мирошина вашешта:
– Чын. Тений апрель гыч чыла пенсий, поснак социальный (а тудыжым республикыштына 16 тӱжем наре еҥ налеш), 1,5 процентлан кӱза. Тыгай пунчалым 16 мартыште лукмо да правовой информацийын официальный порталышкыже вераҥдыме.
Ты гана пенсийым пенсионерын илен лекташ ситыше эн изи пенсийжын индексшылан келшышын кӱзыктат. Кодшо ийын тудо 1,015 лийын. Сандене пенсий тиде коэффициент денак индексироватлалтеш.
Социальный деч посна кугыжаныш обеспечений шотышто пенсият кӱза. Тудыжым техногенный але радиаций катастрофылаште тазалыкым локтылшо, нунын ешышт, Кугу Отечественный сарын инвалидше, участникше, нунын тулык ватышт, лётно-испытательный составын пашаеҥже-влак да тулеч молат налыт. Кугыжаныш обеспечений шотышто пенсийым налше категорий моткоч кумда. Нунын пенсийыштат тӱрлӧ кугытан.
Социальный пенсийым налше посна категорий – тиде икымше группышто улшо инвалид йоча-влак. Нунын пенсийышт 13 241 теҥге марте шуэш.
Чыла тидын дене пырля тыгак пенсий баллын акшым 5,8 процент марте индексироватлат. Тидын шумлык пашам ыштыдыме пенсионер-влакынат пенсийышт изишак кӱза.
М.ИВАНОВА.
