УВЕР ЙОГЫН

Эскераш веле огыл, эше туныкташ

Марий Элым вуйлатыше Александр Евстифеев республикысе ОНФ-ын чолга еҥже-влак дене вашлийын.

Тудо регионысо кучем ончылан шындыме эн ончыч шуктышаш задаче-влак дене палдарен, правительствын кодшо ийысе сеҥымашыжым радамлен, поснак кугыжаныш парымын иземаш тӱҥалмыжым палемден, Марий Элын Федераций Советыште Субъект-влакын кечыштышт участвоватлыме лектышыж нерген ушештарен, ты шотыштак – Йошкар-Ола аэропортын  угыч ышташ тӱҥалмыж нерген.

А. Евстифеев поснак кугу тӱткышым медицине оборудованийым уэмдымылан, социально кӱлешан объект-влакым олмыктымылан да чоҥымылан ойырен, республикыште ятыр ийлан икымше гана вич йочасадым почмо нерген ушештарен. Тыгодымак кугыжаныш кучем ден калыкын ваш мутланен пашам ышташ кӱлмыштым палемден.

«Таче Марий Эл ончылно Россий Президентын шындыме кугу задачыже шога – тиде национальный проект-влакым илышыш пуртымаш, вет тудо социально да экономически кӱлешан чыла аланыште сай кӱкшытыш шуаш йӧным ышта. Нацпроект дене келшышын, республикыштына 1135 км да Йошкар-Олаште 162 км корным шотыш кондышаш улына. Онкологий чер, эмлымвер-влакым олмыктымо паша, калыкын диспансеризацийже, шинчымаш дене кылдалтше йодыш-влакат моткоч кӱлешан улыт», – манын Марий Элым вуйлатыше.

Общественник-влакын пашашт эскерыме дене веле огыл, тыгак кушкын толшо тукымым патриотизм шӱлышеш воспитатлыме дене кылдалтшаш, ОНФ-ын чолга еҥже-шамычлан ушештарен Марий Эл правительствым вуйлатыше.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен.

Опубликовать в Одноклассники

Добавить комментарий