9 мартыште Йошкар-Оласе Сеҥымаш паркыште «Куржталмаш илыш-йӱлашке савырнен» таҥасымаш эрта. Тудо «Искуственный коваште завод» АО-н пашаеҥже, куштылго атлетикын ветеранже, таза илыш-йӱлам кучышо Василий Лебедевын 60 ияш лӱмгечыжлан пӧлеклалтеш.
Физкультурно-спорт мероприятийым куржталаш йӧратыше-влакын «Айвика» клубышт, «Искож завод» АО, В.И.Ленин лӱмеш культур полатын пашаеҥышт эртарат. Кумылан-влак 10 километрым эртат.
Старт 11 шагатлан «Тылын труженикше-влак» чапкӱ воктене пуалтеш.
Куржталаш шонышо спортсмен 100 теҥгем тӱлышаш. 16 ияш марте ӱдыр-рвезе-влаклан ача-аваштын разрешенийышт кўлеш.
Лекше йодышым тыгай адрес дене рашемден кертыда: «ВКонтакте»: www.vk.com/aivika.
Е.Эшкинина
