Салам лийже. Шукерте огыл ныл ияш уныкамлан автокреслым нальым, но тудо автомашинамлан келшен ыш тол: сиденье пелен ӱшанлын, пеҥгыдын кучыкташ огеш лий. Каласыза, пожалуйста, тудым кевытыш пӧртылтен, утларак келшен толшо автокресле дене вашталтен кертам мо?
И.Воронков.
Медведево район.
Йодышлан Марий Элысе Роспотребнадзор виктемын пресс-службыжым вуйлатыше Е.Желонкина вашешта:
– Салам лийже. Формыжо, кугытшо, фасонжо, тӱсшӧ, комплектацийже дене келшен толын огыл, автокреслым весе дене вашталтен кертыда. Тидым сатум налме деч вара 14 кече жапыште ышташда кӱлеш. Тыгодым теве мом шотыш налза: кочкышлан огыл шотлалтше сатум пайдаланыме огыл, тӱсшым, потребительский свойствыжым, пломбыжым, фабрикысе ярлыкшым, тыгак товарный але кассе чекым, але ты сатум тӱлен налмым пеҥгыдемдыше вес документым арален кодымо гын веле весе дене вашталташ лиеш. Товарный але кассе, але сатулан тӱлымым пеҥгыдемдыше вес документ уке гын, свидетельын показанийжылан эҥертен кертыда.
Автокреслым пӧртылташ мийме кечын кевытыште келшен толшо вес сату уке гын, налме-ужалыме ойпидышым шуктымо деч шӧрлен да сату акым окса дене пӧртылташ йодын кертыда. Пытартыш йодмашым сатучо кум кече жапыште шуктышаш.
М.ИВАНОВА.
