УВЕР ЙОГЫН

«Йӧратыме…» Тыге лӱмдат да ойлат нине аптеке нерген

 Ме кеч-могай аптекыш икымше полышлан, эмлан, миен лектына. Тудо мыланна ала-могай ӱшаным пуышо, эмлалтме да… йӧратыме верыш савырна. Тыге шонаш таратыш Волжск кундемысе «Йӧратыме аптеке» сеть.

Волжск олаште тунам медучилищым почыныт веле улмаш. Туныктенытшат тӱҥалтышлан лач кастене. Кум ий шинчымашым погымеке, Татьяна районысо рӱдӧ больницын хирургий отделенийыштыже куд ий медшӱжарлан ыштен. Вара, Пермьысе кугыжаныш фармацевтике академийым 1996-2001 ийлаште тунем лектын, мӧҥгыжӧ пӧртылын да «Маринур» торгайыме рӱдерыште аптекым вуйлатен. А 2008 ийыште Татьяна Александровна индивидуальный предприниматель семын шке аптекыжым почын. Тушечак «Йӧратыме аптеке» сеть тӱҥалтышым налын.

— Ик аптекым кучаш куштылго огыл, а сетьым ышташ – манаш веле. Кузе те тыгай пашалан пижаш лӱдын огыдал? – вигак йодыш лекте.

— Кунам иктаж-мом шонен пыштет да ыштет, кушко-гынат миен шуат. Тӱҥжӧ – лӱдмӧ ок кӱл. Лектеш але ок лек – ыштымеке гына палет. Ик аптекым почат, весым… Чыла яклакан каен, шонеда? Южо вере петырашат логалын… Но тыршыме арам лийын огыл — кандаш аптекына уло, — вашештыш Т.А.Гатиятуллина.

— Но аптеке сетьше Волжск кундемыште икте веле огыл. Конкуренций условийыште кузерак иледа-тӧчеда? – рашемдыме шуо.

— Аптекым почын, вучен гына шинчаш тӱҥалат гын, петырналташат шуко огыл. Эре эскерыман, жап дене тӧр шуаш тыршыман, шуко палыман. Йӧра, кызытсе фармацевтике программе тидлан полша. Компьютер гоч заявкым ышташат, у препарат нерген пален налашат йӧнан. А ужалыше шукыжым ушышто кучышаш, сандене тудым эреак пойдарен толшаш. Но фармацевтна-влак шотышто мыйын ӧпкем уке – нуно тунемше да опытан улыт, — каласыш предприниматель.

Тыге каласаш вес амалат уло: нуным тыште эреак туныктен шогат. Осал чер, грипп але ОРЗ, шарлыме годым поснак. Медицине представитель толеш да занятийым эртара. А вара чер шарлымым рашемдыме шот дене арня еда чумыргат, могай эм да мыняр ужалалтме нерген каласкалат, у препарат дене палыме лийыт. Тидын негызешак черлылан утларак пайдалыжым темлат. А тыгай радамыште пытартыш ийлаште касвел санкцийлан кӧра шкенан элыште ыштен лукмо эмат шукырак кояш тӱҥалын. Но вес элласе дечат кораҥме огыл. Кажныжын шке качествыже, шке ойыртемже. Мемнан алмаштышна (але аналогна), фармацевт-влакын ойлымышт почеш, ӧрдыж гыч кондымо деч нимынярат начар огыл, адакше палынак шулдо.

— Теле пагыт аптеке-влаклан шкешотан тергымаш гай, векат? – йодде шым керт.

— Тыгеат манаш лиеш. Тазалыкым аралыме министерстват мемнам эреак терга, осал чер шарлыме жаплан ямде лияш, эмым ситараш кӱлмӧ нерген шижтара. Но иктаж-могай эм пыта гын, кужу жаплан огыл: заказым ыштет – оптовик-влак эрлашымак кондат.  А чер шарлыме жапше телым веле огыл, шыже-шошымат — йӱкшемдыме але левештыме велеш – кылмыме да вес амал дене лиеда. Кеҥежымат шокшылан кӧра шукын шӱм-вӱргорно, аллергий чер дене орланат. Сандене аптекылан паша идалык мучко гаяк сита, — вашештыш Татьяна Александровна.

— А сетьлаште эм-влакын акышт кугун ойыртемалтыт мо? – оҥайын чучо.

— Кугунжак манаш ок лий. Кӧжын акше изирак, кӧжын скидкыже кугурак. Ме гын скидке йӧнлан эҥертена: пенсионер ден инвалид-влаклан эм акым 10 процент нарылан иземдена гын, эмым 5000 теҥге деч утларак налше-влаклан чылаштлан – 12 процент нарылан*. Сандене налше ӧпкелен ок керт, шонена, — каласыш «Йӧратыме аптеке» сеть вуйлатыше.

Волжск олаште тудын шым аптекыже (Коммунистический, 8/18; Дружба, 9/84; Ленин,23/20; Ленин, 16/1; Шестаков, 6/112; Шестаков, 99/16; 107 бригаде, 2Б) да Приволжский посёлкышто икте (Рынке площадь, 11) улыт. Тушто чылаже 25 пашаеҥ ышта. Нунын тыршымышт дене нине аптеке йӧратымыш савырненыт.

 

Юрий Исаков.

Опубликовать в Одноклассники

Добавить комментарий