УВЕР ЙОГЫН

«Паша келша, кумыл уло…»

Пужен ыштыме ийлаште, чырык курым наре ончыч, рӱдӧ ял илемлаште быт обслуживаний йӧршын гаяк пытыш. Тудым угыч ылыжтарен кертмылан шукынжо ӱшаным йомдарышт. Сотнурышто гына, кужу жап паша деч посна шинчымеке, лу ий ончыч ургымо цехым почаш чолгалыкым мушо еҥ лекте.

Ме тыште кум ий ончыч лийна. Тунам ургымо цехыште лу наре еҥ пашам ышта ыле. Кызыт миймекына – лучко наре. Тугеже кушмо?

— Тыге манашат лиеш. Ончыч ӧрдыж гыч газовик ден чоҥышо-влак деч кугу заказ пура ыле. Но эрежак огыл – идалыклан кок-кум гана. Кызытат нунын дене кыл кӱрлын огыл, йодмаш гына шагалемын. Олмешыже лишнак Озаҥысе «Спецкомплектаций» ООО дене пеҥгыде кылым ыштышна. Тудо пашалык спецвургемым фирмылашке колтылеш, тӱҥ шотышто – чоҥышо организацийлашке. Заказышт эре гаяк уло, ыштен гына шукто. Санденак пашаеҥымат ешарен нална, — вашештыш цех вуйлатыше амалкалче Е.И.Окашева.

Тыште пашаеҥым ешарен налме дене гына огыт серлаге. Кӱлеш годым паша деч варат кодыт, каныш кечылаштат ыштат. Вет йодмым жапыштыже шуктет гын, заказчикат кумылан кодеш, ончыкыланат ӱшан лиеш.

— Кодшо ий мучаште пашаче ешна дене У ий пайремым эртарышна, да тушко заказчикна-влакат толыныт ыле. Нуно тыгак маньыч: «Кузе тендам муынна?..» Вет Озаҥыштат ургымо цех-влак петырналтыныт. А мемнан деке тушеч тора огыл. Арняш ала-мыняр гана кудал толыт, фурнитурым, куэмым кондат. Мыланнат нунын дене ышташ келша: ургымыланна оксам тӱлашак тыршат, огыт вучыкто. Сандене пашадарымат жапыштыже пуэна. Пашаеҥна-влак 15 тӱжем теҥге деч шагал огыт нал, — шылтыде каласыш Елизавета Ивановна.

А пашаеҥже-влак Сотнур веле огыл, Корамас кундем гычат улыт. Тышке автобус дене кудалыштыт. Кужун кучалтме годым амалкалчын пелашыже шке машинашт денат шупшыкта. Манмыла, чылажат заказым шуктымашке виктаралтын. Чаткан урген оптымо вургемыштым ончалатат, тидлан кушто тунемыныт манынат шоналтет.

— Пашаштак, — малдале амалкалче. – Ик операцийым таче пален налыт, эрла – весым. Тыгак тӱрлӧ вургемым ургаш тунемыт. Умылет гын, йӧсыжӧ уке. А самырык-влакын ушышт писе. Кузе ургаш образецымат ончал кертыт. Эше опытан кок ургызына бригадир семын улыт. Нуно, Эльвира  Николаевна Качуева ден Лидия Васильевна Шестакова, шукертсек ыштат гын, чыла тӱрлӧ вургемым – пальто гыч тӱҥалын костюм марте – урген моштат. Садланак ме кеч-могай заказым шукташ ямде улына. Озаҥысе-влакат ӧрыныт: «У заказым кондена – туштак ургеда веле». Самырык-влакат почешак шуаш тыршат. Теве Диана Иванова, Волжскысо индустриально-технологический техникумын Пӧтъял школ пеленысе филиалыштыже  ургызылан тунем лектын, мемнан деке практикыш тольо да тышанак кодо. Тудым эсогыл закройщиклан шогалтенам – ушан ӱдыр. Почешем чыла тунемеш да шинчымашыжым пеҥгыдемдаш колташ гын, сай специалист лиеш.

Ялысе пашадымылык условийыште тыгай пашаче ешым погаш, заказым ситараш да оксам ыштен налаш йӧным пуаш – тидлан, мутат уке, кугу чолгалык кӱлеш. Шкеж верчынат огыл, а чумыр пашаче еш верч тудо вургыж йӱла. Верысе калык ончылно мутым кучымыжымат Елизавета Ивановна умыла. Вет нуно ӧрдыж заказ почеш веле огыл ыштат, калык йодмымат шуктат – иктаж-мом  урген але тӧрлен пуат. Таклан огыл еҥ-влак тауштен ойлат. А шкеж гын пеш тыглай иктешлен каласыш: «Паша келша, кумыл уло…» Ну, конешне, умбакыже ышташ.

Юрий Исаков

Авторын фотожо

Опубликовать в Одноклассники

Добавить комментарий