УВЕР ЙОГЫН

Каток ик татат пуста лийын огыл

Шочмо элым аралышын кечыжлан пӧлеклалтше хоккей дене таҥасымаш Параньга район Усола ялыште кажне ийын эртаралтеш.

Поро йӱлаш савырнен шуктышо спорт мероприятий тений эшеат веселан эртыже манын, организатор-влак Валерий Дмитриев ден ялысе книгагудым вуйлатыше Вера Афанасьева ял калык дене пырля оҥай йӧным шонен муыныт. Кок команде ончычсыла коньким огыл, а портышкемым чиен, ий ӱмбалне куржталын.

Ты спорт мероприятийым эртарен колташ кӱлынак ямдылалтыныт. Ялыште илышыжат, канышлан толшыжат рӱжге ушненыт.

Икшыве-шамычын школышто тунемме жапыште, шуматкечын, пӧръеҥ-влак кечывал эртымешке, катокышто лумым эрыктен ямдыленыт. Хоккейла модмым ончаш, каналташ толшо ден болельщик-влаклан каток воктене шогаш да шокшо кочкышым шолташ вер йоҥгыдо лийже манын, верысе амалкалче Евгений Романов тракторжо дене лумым шӱкен.

Эрлашыжым, рушарнян, лу шагатлан таҥасымаш тӱҥалын. Ялысе самырык рвезе-влакын командышт ветеран-шамычым сеҥен. Коеш, кушкын шогышо тукымын куатше, чулымлыкшо уло. Тугеже армийыш каяш да элым аралаш йӧрышӧ кушкыт. Каток ик татат пуста лийын огыл. Ветеран ден самырык-шамычын модмышт деч вара ӱдырамаш ден пӧръеҥ-влакын командышт капкаш шайбым пурташ тыршен куржталыныт.

Хоккейла модмо коклаштак, каналтыме жапыштат Зоя Осипова ден Надежда Андышева изижымат-кугужымат тамлын пушланыше ӱян пучымыш да шудо чай дене сийленыт.

Р.Чепакова.

Опубликовать в Одноклассники

Добавить комментарий