СПОРТ

Игечат сай, ечыгорнат чапле

24 февральыште Йошкар-Ола воктенсе «Корта» ече базыште скиатлон дене Марий Элын чемпионатше эртыш.

Талырак ечызе-влакын ӧрдыж кундемлашке кайымыштлан кӧра  ты гана таҥасымаште участник-влак шагалын лийыныт. Мутлан, Д.Чекулаев Сыктывкарыште Российын кубокшо верч таҥасымашын финалыштыже, эше икмынярышт Озаҥ оласе марафонышто вийыштым тергеныт.

Ончыч старт ӱдыр-влаклан пуалтын. Палемдыме корным чыланат кертмышт семын куржыныт. Икымше верым Медведево район гыч Анна Романова (тренерже Д.Сергеев) налын. Кокымшо ден кумшо верыш Морко район гыч Ирина Козлова (тренерже Е.Рыбаков) ден Медведево район гыч Ольга Короткова (тренерже Д.Сергеев) лектыныт.

– Изиш черлырак улам, сандене шонымо семын куржын шым керт. Тыгай годым, мутат уке, неле. Такшым кызыт шукын черле улыт, эмлалтыт. Эшеат сай результатым ончыкташ мыланем тренировко ок сите. Тунемам, сандене кечеш кок гана тренировкым эрташ эше жап ок сите, – ойла А.Романова.

– Мый кыртмен куржашыже шоненат омыл. Тиде таҥасымаш всероссийский турнир деч ончыч шкешотан тренировко семын лийын. 26 февральыште  Омскыш полиатлон дене таҥасымашке тарванена. Сандене шкем изиш аралаш шоненам, – рашемдыш ший призёр И.Козлова.

Ӧрдыжтӧ шыпак колышт шогышо, республикыште шке ийготанже-влак коклаште сай результатым ончыктышо Анастасия Соловьёват (Курыкмарий район), чытен ыш керт, ешарыш:

– Ӱдыр-влакын куржмыштым лӱмынак ончаш толынам. Мыят черле улам, сандене ечыгорныш лектын омыл. Мыланна, шке кундемыште таҥасыше-шамычлан сбор, тура курыкан трассе огыт сите. А ӧрдыж кундемыште тале ечызе-влак коклаште таҥасыме годым ме пеш лушкыдо, начарын ямдылалтшыла койына. Нуно, чынжымак, талын куржталыт. Виянрак ечызе-влак дене таҥасен, изиш опыт погына. Тидыже куандара.

Ик жап гыч стартыш рвезе-влак лектыч. Нунын коклаште, чынжымак,  шокшо таҥасымаш эртыш. Сайынак пӱжалташышт логале. Ӱдыр-влак лу километр кужытышто ончыл верыш лекшаш верч таҥасеныт гын, рвезе-шамыч лу километр деч вара, ечым вашталтен (классике йӧн гыч эрыкан йӧныш кусненыт), эше тынарак кужытыш чымалтыныт.

Финишыш кок рвезе, икте-весе дене ӱчаш-ӱчаш, финишыш пырлярак  шуыч. Советский район гыч Алексей Сапаров изишлан ончыко лектын. Кокымшо верым Медведево район гыч Александр Шабалин, кумшо верым Курыкмарий гыч Михаил Ямолкин налыныт.

– Нимыняр неле огыл. Кумылат сай, ечыгорнат чапле, ечымат кӱлеш семын  ямдылыме, пӱртӱсат ечызе-влаклан келшыше, – шӱлешт-шӱлешт, тыгодым шыргыжалын, пелештыш А.Сапаров.

– Мыланемат такшым келшыш. Ноялтеш, но тидын деч посна ок лий, – мане  кокымшо верыш лекше А.Шабалин.

Ечызе-влакын тургымышт умбакыже шуйна. Лишыл жапыште, поснак каныш кечылаште, ончыч тунемше-влак коклаште «Надежда» (жапше годым «Пионерская правда» газетын призше верч) таҥасымаш лиеш гын, икмыняр кече гыч – ече дене Марий Эл чемпионатын кокымшо этапше.

Палаш: Озаҥ олаште вийым тергыше-влак коклаште призёр радамыш логалше-влакат лийыныт: Ч.Зуева икымше, Н.Морозова кокымшо, С.Егоров кокымшо, Н.Васильев нылымше верыш лектыныт. Чылан пӧлек дене пӧртылыныт.

Е.Эшкинина.

Опубликовать в Одноклассники

Добавить комментарий