УВЕР ЙОГЫН

Ача-авам, шочмо элым йӧраташ…

– Срочный службым Ленинградский военный округышто, танковый войскаште, эртенам. Моло семынак пел ий учебкыште лийынам, – ойла Л.Фадеев. – Экипажыште кумытын лийынна. Тунамсе жаплан келшыше танк шкеак «шонен»… Лач кнопкым кунам темдалшашым гына палаш кӱлын. Тиде 1979 ийыште лийын. Афганистаныш каяш рапортым возенам, но колтен огытыл. Мемнан дивизий гыч 20 ротым оркестр дене ужатеныт, а ме казарме окна гыч ончен шоген кодынна. Патриот лийынна. Элым аралымым эн суапле пашалан шотленна. Кок ийысе салтак илыш ӱмыр мучкылан шарнымашеш кодеш. Физически сайын шуаралтме. Тыгодым тӱняончалтышат вашталтын. Шочмо верым, ача-авам, родо-тукымым эшеат чот йӧраташ тунемме.

Мый школышто биатлон, полиатлон, спорт туризм дене пеҥгыде кылым кученам, волейболла, футболла модынам. Ялысе илышеш шуаралтшылан служитлаш чыла шотыштат куштылгырак лийын. Мутлан, куржталмаште, марш-бросокышто, турникыште шкем нєлтымаште… А кӧ физически лушкыдырак лийын, тудо моло деч вожылын, варажым кыртмен ямдылалтын.  

Икте-весе коклаште иза-шольо келшымаш ӱмыр мучкылан шарнымашеш кодын. Тунам, СССР жапыште, 35 еҥан ротышто руш, азербайджан, узбек, икманаш, тӱрлӧ национальностян салтак-влак келшен иленна. Кызытат кылым кучена. Шарнем, дембель альбомым ыштенна. Тудым йӱдым ямдыленна. Молан манаш гын, ротына секретный лийын. Сӱрет да трафарет дене келыштаренна. Пырля служитлыше-влакын адресыштым возен налынна. Кызыт школлаште кадет класс, военно-патриотический клуб-влак  почылтыт. Тидыже куандара.  

Самырык тукымлан теве мом каласыме шуэш: тек рвезе-шамыч кажне кечын физкультур дене пеҥгыде кылым кучат, порысыштым лӱдде шуктат, элнан ӱшанле эргышт лийыт.

Опубликовать в Одноклассники

Добавить комментарий