Марий Элыште 1 май марте вич у фельдшер-акушер пункт пашам ышташ тӱҥалеш.
Регионым вуйлатыше Александр Евстифеев тазалыкым аралыме министр Марина Панькова дене вашлийын да ялысе медицине обслуживаний, ты шотыштак фельдшер-акушер пункт-шамычым технике дене шыҥдарыме нерген мутланен.
«Марина Викторовна, кодшо идалык мучашлан вич у ФАП-ым чоҥымо ыле. Калыкын йодышыжо лектеш, да тудын дене мыят келшем, пашам кӱлынак ыштен кертышт манын, нине пунктышто оборудований ден кадрым кузерак ситарыме?» – мутланышаш темым палемден республикым вуйлатыше.
Министрын мутшо почеш, РФ правительствын пунчалжым шуктымо кышкарыште республикыштына вич ФАП-ым: Советский да Оршанке районлаште кокыт дене да Морко районысо Элнеттӱр ялыште иктым, – чоҥымо, тиде пашан чумыр роскотшо 14 миллион теҥгеш шуын.
ФАП-влакым чоҥымо пашам кӱлешан темылан шотлыман, тудо РФ Президентын Федеральный Погынлан посланийыштыже шындыме задаче-влак дене чак кылдалтын. Элым вуйлатыше В.Путин ялысе калыклан качестван медицине полышым фельдшер-акушер пункт-шамычым вераҥдыме денат налаш йӧным ышташ кӱштен.
Марий Элыште медицине полыш дене ялыштат пайдаланаш лийме йодышлан кугу тӱткышым ойырат. ФАП-влакым 2018 ий декабрь мучаште график почеш чоҥен шуктымо. М.Панькован мутшо почеш, нине тӧнежыш опытан медицине персоналым ситышын налме, ынде 3 миллионат 256 тӱжем теҥгеш медицине оборудованийым налаш кӱлеш.
«Таче Марий Эл правительствын резерв фондшо гыч оксам ойырымо нерген пунчалым луктына гын, пациентна-шамыч нине ФАП-ыш кунам толын кертыт? – йодын Александр Евстифеев. – Икымше майлан пашам ышташ тӱҥалыт мо?»
Тазалыкым аралыме министр тиде жап кӱлешан чыла пашам мучаш марте шукташ сита манын ӱшандарен.
Вашлиймаш деч вара республикым вуйлатыше А.Евстифеев Марий Эл правительствын резерв фондшо гыч палемдыме чыла фельдшер-акушер пунктым технике дене шыҥдараш ситыше суммым ойырымо нерген пунчалым луктын.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен.
