УВЕР ЙОГЫН

«Кылым кучаш, полшаш тӱҥалына»

Эртыше арня мучаште В.Васильев лӱмеш Йылмым, сылнымутым да историйым шымлыше марий институтышто Йошкар-Оласе Морко калыкын вашполыш ушемже черетан погынымашым эртарен.

Тушко ты кундемыште шочын-кушшо да кызыт республикнан рӱдолаштыже илыше да пашам ыштыше-влак чумыргеныт. Нунын коклаште Кугыжаныш Погын председательын алмаштышыже Анатолий Иванов, Морко район администраций вуйлатышын алмаштышыже Алексей Васильев да «Морко мланде» газетын тÿҥ редакторжо Анатолий Титов лийыныт.

2018 ийыште шочмо марий кундемна лÿмгечылан поян лийын. Йошкар-Оласе Морко калыкын вашполыш ушемжат ятыр мероприятийым эртарымашке надырым пыштен. Мутлан, ий еда Йошкар-Олаште Морко районын кечыжым палемдымашке шуко калык чумырга, тыгак «Шарнымаш сорта» акцийыш, «Изи Талешке» модышыш, Колумб лудмашке, Пеледыш пайремыш уло кумылын ушна. Морко кундемын чапланыше еҥже-влакым: Тихон Ефремовым, Владимир Мухин-Савим, Сергей Чавайным, Миклай Казаковым, Михаил Степановым, Мария Семёновам да молымат – шарныме лӱмеш тӱрлӧ вашлиймашым, шанче конференцийым эртарыме. Тылеч посна вашполыш ушемын чолга еҥже-влак: Борис Иванов, Юрий Захаров, Александровмыт еш – шке кӱшеш тӱрлӧ проектым илышыш шыҥдареныт.

– Теният ыштышаш пашана шуко. Поснак «Унчо – финн-угор тӱнян 2019 ийысе культур рӱдыверже» тÿнямбал кÿкшытан программе чыланна дечат шуко вий-куатым йодеш. Сандене ончыкыжымат районысо калык дене пеҥгыде кылым кучаш, кертмына семын полшаш тӱҥалына, – палемден Йошкар-Оласе Морко калыкын вашполыш ушемжым вуйлатыше Евгений Кузьмин.

А.Байкова.

Опубликовать в Одноклассники

Добавить комментарий