ОНФ «шӱк реформо» шотышто шокшо линийым почын.Тудын номерже – 8-800-555-97-76. Тушко чыла еҥ яра йыҥгыртен да тиде теме дене кылдалтше уверым каласен кертеш, манын ОНФ-ын исполкомжым вуйлатыше Михаил Развожаев «шӱк реформылан» пӧлеклалтше пресс-конференцийыште.
Тений Российыште шӱкым погымо да лукмо у системе пашам ышташ тӱҥалын, да тидлан регионысо оператор мутым куча.
Развожаевын ушештарымыж почеш, ОНФ-ын лидерже Владимир Путин Калык фронтлан «шӱк реформым» илышыш пуртымо сӱретым эскераш да тудын нерген радамлаш кӱштен.
«Калыклан рейтинг кӱлешан огыл, тудо шке йодышыжым тыште да кызытак рашемдынеже. Мемнан задачына – «шӱк реформым» верлаште аклаш, – манын исполком вуйлатыше. – Калык фронтышто шӱк дене кылдалтше уверым вучат: тудым луктыт але уке, тиде могайрак жап гыч ышталтеш, платёжкышто могай суммым ончыктымо, тымарте могай вашталтыш лийын…»
Калык фронт тыгак «Молодёжки ОНФ» акцийым увертарен. Тудын кышкарыштыже участник-влак оласе калык, пеҥгыде коммунал шӱкшакым погымо шотышто регионысо оператор да муниципалитет коклаште коммуникатор семын лийыт, вет шуко олаште калык вашмутым арня дене огеш нал.
«Тений платёжкым налше-влак шке оксаштым лачшымак молан тӱлымыштым сайын палышаш улыт. Регионысо оператор-шамыч могай амал дене тарифым нӧлталыныт? Ак кӱзен, а илышыште сай вашталтыш ок кой гын, тугеже молан тынаре тӱлымым умылаш неле. Тыгодым ме тарифым волтымо да шӱкым погымо, лукмо инфраструктурым ыштыме верч шогаш тӱҥалына», – манын Развожаев.
ОНФ 1 мартлан «шӱк реформо» тӱҥалме нерген докладым ямдыла. Тушто цифр веле огыл, тыгак верлаште мо кузе ышталтме нерген репортажат лийыт. Презентоватлыме деч вара докладым реформылан мутым кучышо органлашке, правительствыште да элын президентшылан колта.
М.ИВАНОВА.
