Республикнан чыла общеобразовательный школыштыжо военно-патриотический шўлышан мероприятий-влак эртаралтыт.
Таче мутем Параньга район Кугу Пумарий кыдалаш школышто ОБЖ, технологий да физический культур предметым вӱдышӧ Л.Фадеев нерген. Леонид Петрович шкежат ты школышто тунемын. Опытан (38 ий) туныктышо.
Ятыр ий ӱдыр-рвезе-влакым таза илыш-йӱлалан кумылаҥда, шочмо верым, элым йӧраташ туныкта. «Изи айдемын илыш-корныжо ешыште тӱҥалеш, тыгодым сай негызым школышто пыштат, шонем. Тидланже, мутат уке, ме, туныктышо-влак полшышаш, шке примерна дене пеҥгыдемден куштышаш улына», – манеш Россий образованийын почетан пашаеҥже, Марий Элын сулло туныктышыжо.
Школышто 2007 ий гыч «Самырык вий» военно-патриотический клуб пашам ышта. Тушко коштшо-влак тӱрлӧ мероприятийлаште вийыштым тергат, мастарлыкыштым ончыктат, таҥасымашлашке лектыт.
– Самырык тукымым таза илыш-йўлалан кумылаҥдыме деч посна рвезе-влакым армийыште служитлаш ямдылаш, физкультур да спорт дене пеҥгыде кылым кучаш шӱмаҥдаш тыршена. Пытартыш ийлаште – поснак. Мутлан, армийыш кайышаш-влак коклаште кажне ийын теле да кеҥеж спартакиаде эрта. Район кӱкшытыштє икмыняр ий почела икымше верым налынна. Республик кўкшытыштат сеҥыше да призёр радамыш логалынна, – ойла Л.Фадеев. – Тидыже сай: йоча-влак чыла велым шуаралтыт. Самырык-влак элым йӧратыше кушкышт, шонена. Теве эртыше кечылаште спартакиадын район этапше (теле полиатлон, кирам нӧлтымаш) лие. Мемнан школ гыч Максим Чирков кирам нӧлтымаште (4 минутышто 128 гана), тыгак лӱйкалымаште икымше верым налын. Сергей Казанцев полиатлонышто кумшо верыш лектын.
Занятийыштыжат кызыт кугу тӱткышым строй да физический ямдылалтмашлан ойырат. Чон йӱлен, шке пашам йӧратен ыштышын лектышыжат куандарыше лиеш. Лач ты радамыш пуртыман Л.Фадеевым. Тудын воспитанникше-влак кокла гыч ныл еҥ спорт мастер нормативым шуктен. Тиде В.Терентьев, А.Булыгин, А.Фадеев, Н.Смирнов (чаманен каласыман, ӱмыр лугыч лийын). Жапше годым тыште биатлонат сайын вияҥын.
Молын семынак проблемыжат уло. Шукыжо шийвундо дене кылдалтын. Таҥасымашлашке тунемше-влак шонымо семын лектын огыт керт. Калашниковын автоматше огеш сите, но оборонно-массовый да военно-патриотический паша месячникыш кумылын ушнат.
– Тудым ме чапкӱ воктеке нулго укш гыч ыштыме гирляндым пыштыме гыч тӱҥалынна. Туштак паша планым каҥашенна. Патриотизм шӱлыш дене кылдалтше ятыр мероприятийым эртарена. Жап, вий-куат кӱлыт, уш-акылымат пудыратылман, но самырык тукымым куштымаште тиде кӱлешан паша, – пеҥгыдемда Леонид Петрович. – 15 февральыште Афганистан гыч совет войскам лукмылан 30 ий темме лӱмеш келыштаралтше митинг сайын эртыш. Мемнан школым тунем лекше лу рвезе шке порысшым ты йот элыште шуктен. Ончылно эше «Победа» военно-спортивный модыш, «А, ну-ка, рвезе-влак!» конкурс вучат.
Йӧн дене пайдаланен, пӧръеҥ, сарын ветеранже, курсант-влакым Шочмо элым аралышын кечыж дене шокшын саламлем да пеҥгыде тазалыкым, вуй ӱмбалне канде кавам тыланем.
Е.Эшкинина.
