УВЕР ЙОГЫН

Подвигыштым шарнена, огына мондо

15 февральыште Афганистан гыч совет войскам лукмылан 30 ий темын.

Ты кечын элна мучко тиде исторический событийлан пєлеклалтше шарнымаш мероприятий лийын. Марий Элат ӧрдыжеш кодын огыл. Тӱҥ торжественный митинг Йошкар-Олаште, «Курымашлык тул» воктене, эртен. Тушко регионнан тӱрлӧ районжо гыч ветеран-афганец-влак чумыргеныт.

Элна деч ӧрдыжтӧ шке служебный порысыштым шуктышо-влакым шарналташ, нунылан пагалымашым ончыкташ Афган сарын ветеранже, «шокшо точкылаште» илыш гыч кайыше-шамычын родо-тукымышт, йолташышт, мер ушемын еҥышт, моло сарлаште лийше участник-влак, тыгак самырык тукым толыныт.   

– Порысым шуктышыштла сареш вуйыштым пыштыше-влакым ме нигунам огына мондо. Нуно бойыш ӱшанлын каеныт, шке интернационал порысыштым мучаш марте шуктеныт. Афган сарын пагалыме ветеранже-влак, патырлыкым ончыктымыланда, вий-куатым пыштымыланда тау, –Марий Эл вуйлатыше А.Евстифеевын мутшым Марий Эл правительстве председательын алмаштышыже И.Дравниеце лудын.

Митингын участникше-влак сєй пасуэш вуйым пыштыше салтак ден офицер-влакым орудийын залпше почеш ик  минут шып шоген шарналтеныт. Йошкар-Оласе гарнизонын войскаже ден «Курымашлык батальонын» торжественный маршышт кугешнымаш, пайрем кумылым луктыныт.

Варажым тӱшкан «Павшим воинам посвящается» стела ден Курымашлык тул воктеке пеледыш аршашым пыштеныт.

Шарнымаш мероприятий умбакыже Сеҥымашлан XXX идалык лӱмеш культур полатыште шуйнен. Тушто Афган сарын участникше-влаклан кугыжаныш наградым кучыктеныт да толшо уна-влакым художественный номерла дене куандареныт.

Республикыште ветеран движенийым пыштымашке шке надырыштым пыштымылан, самырык тукымым патриотизм шӱлышеш шуарен куштымаште чолган тыршымылан  да тыгак Афганистан гыч совет войскам лукмылан 30 ий темме дене Марий Эл вуйлатышын тауштыме серышыжым Рашит Ахметшинлан, Василий Исаевлан, Риннат Камаевлан, Сергей Лобановлан, Александр Пайковлан кучыктеныт.

Е.Эшкинина.  

Опубликовать в Одноклассники

Добавить комментарий