Сочиште эртыше Российысе инвестиционный форумышто Марий Эл вуйлатыше Александр Евстифеев республикым вияҥдышашлан икмыняр кӱлешан ойпидышым ыштен.
Пленарный заседаний деч вара тудо Кластер ден технопарк-влакым вияҥдаш полшышо организаций-влак ассоциаций директор Андрей Шпиленко дене вашлийын да вашкыл шотышто ойпидышым ыштеныт.
Марий Эл вуйлатыше тыгак Промышленностьым вияҥдыме фонд директор Роман Петрупа дене ойпидышым пеҥгыдемденыт. Тудын дене келшышын организационный, правовой, экономический, финансовый да технический йодыш-влак шотышто ваш келшен пашам ыштымаш ончыкыжым Марий Элыште кӱкшӧ технологиян производствым вияҥдаш, у продукцийым лукташ, ешартыш паша верым ышташ, тӱрлӧ кӱкшытан бюджетыш налог оксам ешараш полшышаш.
Форум жапыштак Марий Эл ден Удмуртий торговльо, образований, социальный политике, тазалыкым аралымаш, физический культур да спорт, тӱвыра да туризм, кугыжаныш национальный политике шотышто вашкыл нерген соглашенийым подписатленыт. Удмурт Республик вуйлатыше Александр Бречалов образований, культур да творчестве сферылаште Марий Эл кызытат партнер манын палемден да ончыкыжым промышленность, икте-весылан сатум колтымо шотышто проектым илышыш пурташ ямде улмым пеҥгыдемден каласен.
Марий Эл Республик вуйлатыше тыгак экологий дене кылдалтше пашам пырля шукташ мутланен келшыме нерген ойлен.
Л.Камалетдинова.
