КУЛЬТУР ДА ИСКУССТВО ТЕАТР

«Геройын илышыжым илен лекман»

17 мартыште Марий Элын сулло артистше Наталья Зуевас (Кораблёва) «Тендан пелен чонем мура» бенефисше лиеш. Ты пайремыш тудо Марий самырык театрыште 25 ий пашам ыштыме да шукерте огыл «Марий Элын сулло артистше» лӱмым налме амал дене лишыл еҥже, родо-тукымжо да йолташыже-влакым чумыра.

Драмыштат, комедийыштат

Наташа – Шернур район Кугу Шокшем ялын ӱдыржӧ. Изинекак тудо мураш йӧратен,  артист койышан кушкын, сандене школ деч вара И.Палантай лӱмеш музыкальный училищын (кызыт И.Палантай лӱмеш культур да искусство колледж) икымше курсышкыжо тунемаш пурен да тунамак Марий самырык театрын коллективышкыже ушнен.

— Артист корным ойырен налмыжлан моткоч ӧрынам ыле, — палемда Наташан аваже Зоя Михайловна. — Тудын Наташа Ростован рольжым модмыжо шуын улмаш.

Н.Кораблёва театрыш толшо-влакым ынде коло вич ий мастарлыкше дене куандара. Спектакльаште тӱрлӧ образыште лияшыже логалын: «Шергашыште» Лизукым, «Илаш гын, илашыште…» Верукым, «Кай, кай Йыванланыште» Кетерукым, «Ава шӱмыштӧ» Пӧклам да молымат модын.

— А икымше ролем «Чоя Мераҥ» йомакыште лийын, Оза кувам модынам, — шарналта актрисе. — Студент пагытыште театр коллективыш ушнымо да опытан артист-влак дене сценыш лекме шуко жаплан шарнаш кодеш.

Пытартыш жапыште Наташалан тӱҥ рольым ӱшанат. Мутлан, «Корнывож пеледыш» спектакльыште тудо тӱҥ геройын аважым модеш. Образыш келгын пурымыж дене Наташа тургыжланаш, илыш нерген шоналташ тарата.

— Тиде пьесым Дина акам возен. Тушто аванан илыш-корныжо сӱретлалтеш. Юмылан тау, авана ила, 82 ияш. Мемнам тудо кажне гана шочмо суртышкына куанен вуча, — чонжым почо театрын артистше. — Спектакльыште образыш пураш манын, авамым чотак эскеренам, тудын койышыжым, тошкештмыжым шекланенам. Рольым модмем годым чотак ойгыренам. А ошкылмем южгунамже чылт авам гаяк чучеш.

Наташалан «Ачий, ачием» спектакльыштат туныктышо Зинаида Николаевнан рольжым модаш келша. Тиддеч посна ятыр йомакыште тудын рольжо уло, Баба Яга, Сӧсна, Фиона, Кикимор да молат лиеш.

— Йоча-шамычлан модаш шкешотан мастарлык кӱлеш. Нуным ондалаш огеш лий: чыла ужыт, шижыт, умылат. Тыгай годым 45 минутшат кок шагат шуйнымыла чучеш, — воштылеш актрисе. — Тунам шкеат йоча пагытыш пӧртылат, йоча семын юарлет, модат.   

— Наташалан кеч-могай рольымат ӱшанен пуаш лиеш. Образым чоҥаш манын, тудо шона, кычалеш, а мом огеш умыло гын йодеш, — мут мундыражым ронча Марий Элын калык артистше, режиссёр Зинаида Долгова. — Кунам рольым шке чон вошт колтен модат, геройын илышыжым илен лектат, тунам веле пашат калыкын кумылжым савыра. А нине шомак-влак Наташалан моткоч келшен толыт.

Муро кумылым нӧлта

Н.Кораблёва поро кумылан, мыскара койыш-шоктышан ава, пелаш. Тидыже, очыни, ава шӧр дене тудлан куснен. Наташан аваж дене мутланыме годым мыскара койышыжо сайынак палдырныш. А кузе тудо мурен мошта! Тудлан пӱртӱс сылне, шӱшпык гай яндар йӱкым пуэн. Теве изиракше годым пӧрт воктенысе ломбыш кӱзен, уло ялым шергылтарен мурымыжым кызытат шарналтен воштылеш. Чодыраште емыж-саскам, поҥгым погымыж годымат,  шудым солымаштат Наташан йӱкшӧ торашке шергылтын. Руш артист-шамычын мурыштымат, марий такмак-влакымат шуко пален. Кызытат нуно, вич акак-шӱжар (иктыже Пошкырт кундемыште, а молышт Йошкар-Олаштак илат), тукым ака-шӱжарже-влак, погынен, икмыняр йӱк дене мурат. Наташан йоҥгалтарыме мурыжо-влакым Марий Эл радиоштат колаш лиеш.

— Клубышто пашам ыштымем годым изи икшывем-влакымат концертыш наҥгаем ыле. Чылан пырля муренна, — ойла аваже. — Муро-влакым лӱмынак тетрадьыш возен луктынна. А кызыт ынде мондалтыт, южо корнылаштым веле шарнем.

Наташан мыскара койышыжым «Марий подкогыльо» команде дене сценыш лекмыж годым ужаш лиеш. Участник-влак «Воштылаш, товатат, сулык огыл!» фестивальыш кажне ийын ушнат, тӱрлӧ мыскара дене калыкым куандарат.

Шочмо ял, сурт, ава деч шерге мо уло, ала?

Наташа пелашыж дене коктын кок ӱдырым ончен куштат. Юлита Йошкар-Оласе медицине колледжыште тунемеш, врач лияш ямдылалтеш. А Юана 1-ше №-ан школышто 9-ше классыште шинчымашым пойдара, волейбол дене модаш йӧрата.

Кажне каныш кечылан Наташан да тудын ака-шӱжарже-влакын ешышт шочмо Шернур кундемышкышт вашкат, вет тушто нуным 82 ияш ава, 8 уныкан кова чон вургыж вуча.

— Шочмо верыш миен толмеке, шулдырем кушкеш. Авам дене вычыматен мутланыме, ака-шӱжар-влак дене вашлийын, мутым вашталтыме, поро пошкудо-шамыч дене ужын кутырымыжак мом шога! Шочмо суртыш миен толмеке, вий ешаралтеш. Арам огыл калыкыште ойлат: «Шочмо суртышто пырдыжшат эмла» — куанен каласыш Марий самырык театрын  артистше Н.Зуевас.    

 

 

Алевтина Байкова

Фото-влакым театрын архивше гыч налме

Опубликовать в Одноклассники

Добавить комментарий