Йошкар-Олаште регион-влак кокласе марий мер толкынын кугурак-влакын советышт ышталтме нерген возенна ыле. Эртыше кечылаште тудын организацийонный погынымашыже эртен. Ончыктен кодыман, правленийышкыже шым еҥ пурен: Марий Эл Кугыжаныш Погын председательын алмаштышыже А.Н.Иванов, Мер Каҥашын исполкомжын председательже да кугурак-влакын советыштым вуйлатышын алмаштышыже В.И.Иванов, республикын ончычсо образований министрже, Йошкар-Оласе ветеран-влакын советыштым вуйлатыше Г.М.Мустаев, Т.Евсеев лӱмеш национальный тоштерын ончычсо директоржо А.В.Муравьев, Морко районысо Кокласола лицейын ончычсо директоржо А.А.Васильев, Оршанке районысо администраций вуйлатышын ончычсо алмаштышыже Л.С.Протасова да Озаҥ оласе марий-влакын национально-культурный автономижын еҥже В.Г.Мусихин.
Кугурак-влакын советышт коллегиальный органлан шотлалтеш, республикысе районлаште, марий-влакын тӱшкан илыман Российысе регионлаште тудын шке структурыжо уло. Совет марий мер толкынлан вияҥаш полшышо шонымаш ден иктешлымашым ямдылаш ышталтын. Тыгак мер толкыным вияҥден колтен кертше йодыш-влакым тарватен да ончен лектын кертеш.
Эртыше погынымаште правленийын еҥже-влак икмыняр йодышым каҥашеныт. Поснак марий йылмым арален кодымо дене кылдалтше йодышышто шогалыныт. Мутланымаш почеш раш пунчал-влакым луктыныт, советын шуктышаш паша планжым палемденыт.
С.Николаева.
Эрвел марий-влак нерген
Марий шанчызе-влакын пашаштым иктешлыше эше ик у книга ош тӱням ужын.
Тудо эрвел марий-влакын тӱвыра поянлыкышт дене палдара да этнографий очерк-влакым уша. Нунын историйышт, илыш йӱла ден тӱвырашт ончыкталтеш. Ты этнографий сборникым философий науко доктор Ильдико Лехтинен чумырен. Книган авторжо-влак коклаште МарНИИЯЛИ-н этнологий пӧлкаштыже тыршыше историй науко кандидат-влак Тамара Молотова ден Никандр Попов улыт. Книга Финляндийысе Тӱвыра фондын полшымыж дене савыкталтын. Тудо краевед, искусствовед, историк, студент-влаклан онай лийшаш.
С.Носова.
