КУЛЬТУР ДА ИСКУССТВО УВЕР ЙОГЫН

«Илаш» шинчавӱдым луктын

Кодшо кечылаште Йошкар-Олаште «Фейерверк талантов-2019» II куштымаш фестиваль-конкурс эртен.

Тушко Йошкар-Оласе, тӱрлӧ районысо да Чуваший Республик гыч усталык коллектив-влак ушненыт. 

Фестивальыш тазалык шотышто начар йоча-влакат ушненыт. Савинысе интернат-пӧрт гыч икшыве-шамыч «Дебют» образцовый ансамбль дене «Инклюзив» номинацийыште мастарлыкым ончыктеныт.

— Таза да тазалык шотышто начар йоча-шамыч дене пырля куштымашым шындыме шотышто калыкын тӱрлӧ шонымашыже лийын, — ойла «Дебют» ансамбльым вуйлатыше, фестиваль-конкурсын организаторжо Анна Соколова. — «Жить»  — тиде куштымаш веле огыл, кӱлешан кугу проект. Тидын гоч йоча-шамыч келшен, икте-весылан полшен илымыштым, иктӧр улмыштым ончыкташ тыршеныт. Чылаже сценыште 50 еҥ куштен. Залыште шинчыше-влак моткоч шокшын вашлийыныт, кынел шогалын, совым рӱж кыреныт, «Браво!» манын кычкыреныт, эсогыл шинчавӱдым ӱштшат лийыныт. А тиде, мутат уке, шонымашкына шумым ончыкта.

Участник-влакын мастарлыкыштым жюри аклен. Тудын председательже — Татарстан Республикын калык артистше,  Озаҥ оласе культур институтын куштымаш искусство факультетшын деканже, доцент Тагир Латифуллин.

Фестивальыште сеҥыше-влакым тӱрлӧ номинацийыште палемленыт. Гран-при дене кум коллектив: Савинысе интернат-пӧртын воспитанникше дене пырля  «Дебют» образцовый, «Пластилин» ансамбль-влак, Чуваший гыч «Экситон» куштымаш да спорт клуб — палемдалтын.

А.Байкова.

Опубликовать в Одноклассники

Добавить комментарий