СПОРТ

Икымше гана

2-3 февральыште Волжскышто снегоход дене Российын чемпионатше эртен. Тыгайже ты кундемыште икымше гана лийын.

Участник-шамыч элнан тӱрлӧ кундемже гыч чумыргеныт, нуно Юл кундемыште илыше ден уна-влакым лум курыкан трамплин гыч тӧрштылмышт дене ӧрыктареныт, весела канышым пӧлекленыт.

Спортсмен-экстремал-влакым саламлаш Марий Элын молодёжный политике, спорт да туризм министрже Л.Батюкова миен, организатор-шамычлан тауштен, пиалан стартым тыланен.

Пытартыш жапыште Волжскышто спортын технический видшылан, чынжымак, кугу тӱткышым ойырат. Ты кундем мотоспортын рӱдерышкыже савырнен манашат келшен толеш. Тидын шотышто Марий Элын  мотоциклетный спорт федерацийжым мокталтыман. Регионышто шкешотан экстремал спортым вияҥден колтымо шотышто (поснак В.Астраханцев тырша) тудо кугу пашам эртара.

Трассым «Машиностроитель» микрорайонышто спецтехнике дене ямдыленыт. Участник-влак пеш сай условийыште таҥасеныт, сай результатым ончыктеныт. Южгунамже пуйто южышто «чоҥештылыныт»…

«Суперспорт А» тӱшкаште Новый Уренгой гыч Я.Карпман ончыко лектын.  Вес классыште тиде кундем гычак Д.Скоропуд ойыртемалтын. Тиде тӱшкаштак ий ӱмбалне мотогонко дене 8 гана тӱнямбал чемпион  Н.Красников кокымшо лийын, а бронзо медаль волжанин А.Воробьёвлан логалын.

Ты кугу, неле трассыштак 5-6 ияш рвезе-влакат мастарлыкыштым  ончыктеныт. Тиде старт нунылан шуко жаплан поро шарнымашеш кодеш.

Е.Эшкинина.

Опубликовать в Одноклассники

Добавить комментарий