УВЕР ЙОГЫН

Икте илышым вурса, весе тудлан куанен мошта

Марий Турек районысо Шӱргынур ял гыч Геннадий Иванович Андреев 70 ияш гынат, гармоньым туге устан шокта – парняже-влак паҥга мучко самырыкын гаяк  «куржталыт» веле!

А вет тудо илалше улмо деч посна эше – инвалид. 13 ий ончычак, 2006 ийыште, кок йолжо деч посна кодын.

— Ик жап мый йӱдвелыште, Сургутышто, пашам ыштенам – машина дене кудалыштынам. Ик теле кечын техникем пудырген. Ачален шогылтын, уремыште кужу жап лияш логалмылан кӧра кок йолыштемат парням йӱштӧ налын. Но тӱҥалтыште тидлан кугу тӱткышым ойырен омыл. Да арам улмаш, вет варажым йол шӱаш тӱҥалын, — каласкалыш пӧръеҥ. Тудын дене ме эше кодшо ий шыжымак У Торъял поселкысо тӱвыра пӧртыштӧ уста туныктышо да талантан гармоньчо Анатолий Булыгиным шарныме лӱмеш эртаралтше «Шокто, йӧратыме гармонем!» фестиваль-конкурсышто палыме лийынна.

Туткар лийме деч вара пӧръеҥ, ойлымыж почеш, Йошкар-Олаште, Чебоксарыште, моло вереат кужу жап эмлалтын гынат, йолжым утарен коден кертын огытыл. Когынекшат  пулвуй деч кӱшычрак пӱчкыныт…

Тиде огеш сите – тылеч варак Геннадий Ивановичын йӱкшӧ йомын. Кызытат тудо пеле йӱкынрак да чарганрак веле мутлана. Очыни, санденак гармоньым шоктымыж годым огеш муро. А вет чонжо йодеш дыр…

Ампутаций деч варак пӧръеҥын шинча пӱсылыкшат начаремын. Шинчалык деч посна тудо йӧршеш нимом гаяк огеш уж. Ужеш гынат, чот вудакан.  

Но тале гармоньчо вуйым огеш саке. Илышланат ӧпкем огеш кучо. Мӧҥгешла, эреак весела кумылан лияш тырша. Теве мутланымына годым тудо лийше ойго нерген чарныде каласкалыме олмеш, тидын нерген кӱчыкын, манмыла, ик-кок мут дене гына ойлыш да ойжым писын вес велке савырале:

— Кызыт тевыс тыге, ик вере да вес вере, выступатлен коштына.

А гармоньым тудо куд ияш улмыж годымак шокташ тӱҥалын.

— Тыгай изи ньогак илалше ковай-шамычым мурыктен коштынам вет – пайрем годым эре мыйым пеленышт наҥгаят ыле, — шыргыжал-воштыл палемдыш пӧръеҥ. Вара ешарыш:

— Санденак лачшымак Арбор велысе ожнысо семым шоктышыжо мыяк веле кодынам дыр, шонем.

Арам огыл Геннадий Андреев тӱрлӧ конкурсышто диплом-влак дене палемдалтын, ятыр гана сеҥыше-влак радамыш логалын. Марий Турек районыштыжо веле огыл, пошкудо кундемлаштат, республик кӱкшытыштат. Эсогыл Татарстаныштат, Киров областьыштат мастарлыкшым кӱкшын акленыт. Теве У Торъял поселкышто эртыше фестиваль-конкурс гычат тудым диплом да пӧлек деч посна ышт колто.

Уста еҥ кеч-мо шотыштат уста, маныт. Чынак. Теве Геннадий Ивановичат гармоньым шокташ веле огыл тале, эше тудо техникылан путырак шӱман.

— Ончыч «шестёрко» машинам ыле, вара – «девятке». А кызыт – «двенашке». Кажныжым налмекат, нуным мый шканем кӱлеш семын келыштарылынам. Кудалыштам. Ничего, — мане.

А илышыште ӱшанже кызыт шканжак веле, манаш лиеш. Пелашыж дене эше 1996 ийыштак ойырленыт. Сандене алят вате деч посна илышташ тӧча.

— Йол деч посна кодшылан, коштын кертдымылан шкетынже пешак йӧсыс! – чаманенрак маньым. Но тидлан пӧръеҥ мыскара йӧре веле вашештыш:

— Тунемалтын. Коляскем уло. Тудын дене кушко кӱлеш, тушко тыр-р-р веле кудал колтем!

Илышыште шукыж годым тыгай сӱрет вашлиялтеш: кидше, йолжо уло, таза, ошкыл колтенат, чыла ыштенат кертеш, но, пӧръеҥ улмым ончыде, ала-кудыжо эреак илышлан вуйжым шиеш, эре мо гынат огеш йӧрӧ, огеш келше, шонымыж семын огыл, эре ала-кӧ титакан… А весе кугу ойгыш логалеш гынат, манмыла, пеҥыж-пеҥыж, мландым пурын, но илен лектеш, чыла чыта да, пӱрымашлан ӧпкелалтде, эр гыч тӱҥалын кас марте иктымат вурсен шинчыде, ончыко кая, илышыште куанле татым гына ужаш да муаш тырша. Теве тиде кочай семын…

Любовь Камалетдинова.

Авторын фотожо.

Опубликовать в Одноклассники

Добавить комментарий