УВЕР ЙОГЫН

Улыжат кумытын кодыныт

1995 ий 13 мартыште лукмо федеральный закон дене келшышын, Совет войскан немыч-фашист войскам Сталинград кредалмаште кырен шалатыме кече талук еда 2 февральыште палемдалтеш.

Марий Эл Кугыжаныш архивын документше почеш, Сталинград кредалмаште регионна гыч 1976 еҥ лийын, тышечын 1240 салтак сӧйыштӧ вуйжым пыштен. «За оборону Сталинграда» медаль дене 322 еҥ палемдалтын.

Республикна Сталинград кредалмаште Совет Ушемын Геройжо лӱмым налше Михаил Лебедев, Зинон Прохоров, Захар Семенюк дене кугешна. А Михаил Елисеевлан тиде чап лӱмым колымыж деч вара пуымо.

«Тений совет войскан Сталинград кредалмаште сеҥымыжлан 76 ий теме. Калыкнан тушто икоян улмыжо, пеҥгыдын шогымыжо, шочмо элым йӧратымыже – ончыкылык тукымлан пример. Чаманен палемдыман, Марий Элыште тиде событийын кум участникше веле кодын – Йошкар-Олаште, Медведево ден У Торъял районлаште. Ӱмаште гына вич участникым йомдарышна. Ме нунын ончылно вуйнам савена. Тыланда поро мутым ойлаш – мыланна кугу пиал. Тазалыкым, вуй ӱмбалне канде кавам, йӧратымашым, куаным, пиалым да лишыл еҥда-влакын поро кумылыштым тыланем», – ветеран-влакым саламлен Марий Элын социальный вияҥмаш министрже Ольга Фёдорова.

М.ИВАНОВА.

Опубликовать в Одноклассники

Добавить комментарий