Кодшо ийын республикыштына шушаш 10 ийлан у Чодыра планым пеҥгыдемденыт. Тудо 1 январь гыч вийыш пурен. Планым лесничестве-влакын у регламентыштым шотыш налын ямдылыме. Тидын нерген кодшо кечылаште Марий Элын Пӱртӱс поянлык, экологий да йырым-йырысе средам аралыме шотышто министерствыште чодыра озанлык пашам виктарыше-влакын совещанийыштышт ойленыт.
Тушко тыгак чодыра участке-влакын арендаторыштым ӱжыныт. Совещанийыште Марий Элын пӱртӱс поянлык, экологий да йырым-йырысе средам аралыме шотышто министр Владимир Шутов да Чодыра отрасль пашаеҥ-влакын профсоюз рескомжын председательже Александр Пайдыганов лийыныт.
Погынышо-влак кодшо ийысе паша лектышым иктешленыт да тений ворандарышаш планым пеҥгыдемденыт.
Кодшо ийын республикысе чодыра фондын кумдыкыштыжо 1079,3 тӱжем кубометр пум ямдыленыт. Еҥ-влаклан пӧртым чоҥаш, олмыкташ да ырыкташ 107 тӱжем кубометр пум ойырымо шотышто 2720 ойпидыш ышталтын. Тидыже тулеч ончычсо ий дене таҥастарымаште кок пачаш шукырак лийын.
Чодыра шотышто полномочийым шуктышашлан федеральный бюджет гыч Марий Эллан ойыралтше субвенций кугытат палынак кушкын. Тидлан кӧра ты отрасльыште ыштыше-влакын пашадарышт палынак кугемын. Республикысе чодыра дене пайдаланыме паша кугыжаныш бюджетышкат 222,8 миллион теҥгеаш парышым конден. Тулеч ончычсо ий дене таҥастарымаште тидыже 1,5 пачаш шукырак. Чодыра арендатор-влакын парымыштат иземын.
С.Носова.
