18 январьыште Япон теҥыз Татарский пролив акваторий ӱмбалне чоҥештыше СУ-34 истребитель-бомбардировщикын шаланымыжлан кӧра штурман Алексей Пайдыганов ден пилот Алексей Овсянников коленыт. Нунын дене 22 январьыште Барнаулышто чеверласеныт.
Варажым рашемын: Алексей Пайдыганов Йошкар-Олаште шочын-кушкын улмаш. ВВС майор шке жапыштыже Челябинскысе штурман-влакым ямдылыше кӱшыл авиационный училищым тунем лектын. 42 ияш лётчик ешыж дене шукерте огыл Барнаулыш илаш куснен. Сулен налме канышыш лекмеке, тушто илаш шонен. Пелашыже да кум эргыже тулыкеш кодыныт.
Российысе СМИ-влакын возымышт почеш, тиде туткар тунемме тренировкым эртарыме годым лийын. ВВС ден ПВО дальневосточный объединенийын СУ-34 кок самолётшо южышто шулдырышт дене ваш тӱкненыт. Экипаж-влак катапультироватлалтыныт. Но пилот ден штурманын парашют кандырашт пӱтырналтын. Вес самолетын экипажше гыч ик еҥже утаралтын. А тудын йолташыжым але марте муын огытыл.
REGNUM увер агентствын увертарымыж почеш, Российысе Уголовный кодексын «Чоҥештылме правилым пудыртымаш да тудлан ямдылалтмаш» статьяж почеш уголовный делам тарватеныт. Туткарын амалжым пилотированийыште йоҥылыш лиймым палемдат.
С.Носова
