Пытартыш вич ий жапыште Марий Эл Республикна пренатальный скрининг шотышто Российыште ик эн ончыл радамыште кая.
Россий Минздравын Йоча-влаклан медицине полышым пуымо департаментше ден Азам ышташ полшымо службыжо пренатальный скринингым кугу кӱкшытыштӧ эртарыше регион-влак коклаште ий еда рейтингым эртарат. Нунын иктешлымашышт почеш, Марий Эл ынде вич ий почела Российын эн сай регионжо-влак коклаш пура.
Марий Эл деч посна ончыл радамыште тыгак Татарстан Республик, Моско, Смоленск, Свердловск, Курск областьла, Хант-Манси автономный округ улыт.
Пренатальный скрининг – тиде лабораторий да ультрайӱк технологий полшымо дене мӱшкыран ӱдырамашым келгын шымлымаш. Тиде йӧн ава шӱм йымалне иланыше азан вияҥме ситыдымашыжым, эсогыл хромосом аномалийжым тӱҥалтыш йыжыҥыштак рашемдаш полша. Тудын полшымыж дене медик-шамыч азан ятыр чержым ош тӱняш толмыж мартеак эмлат.
М.ИВАНОВА.
