УВЕР ЙОГЫН

Ынде тичмаш куат дене ышта

25 декабрьыште РТРС-ын Марий Эл Республикысе филиалже кокымшо мультиплексын пытартыш передатчикшым чӱктен. Тыге цифровой телесеть тичмашын пашам ышташ тӱҥалын. Ынде Марий Элыште илыше чумыр калык гыч 99,7 процентше 20 цифровой каналым яра ончен кертеш.

2011 ий гыч РТРС регионыштына вещатлыше 31 объектым чоҥен. Тудын чумыр кӱкшытшӧ 2,5 км шуын. «Цифр» толмеш, регионысо кумшо ужаш (34%) калык нылыт деч шуко телеканалым ончен кертын огыл. Единый увер стандарт кугу олала ден изи, ты шотыштак тора яллаште илыше-влаклан информацийым ик семын налаш йӧным ыштен.

2016 ий гыч икымше мультиплексын  «Россия 1», «Россия 24» да «Радио России» программыже-влак дене Марий Элыште илыше 99 процент еҥ пайдаланен кертын.

2019 ий 3 июнь гыч регионна тичмашнек цифровой технологийыш кусна – аналоговый вещаний пыта. Регионысо да мультиплексын составышкыже пурыдымо канал-влак аналоговый вещанийыште лийыт.

Цифровой эфир телевидений сӱретын да йӱкын сай качествышт, шуко каналже, приёмникым куштылгын келыштарыме дене йӧнан. Тыгодым абонент оксам тӱлаш ок тӱҥал. Кызытсе жаплан келшыше телевизор цифровой эфир телеканалым кучаш ямде. Тушко пӧлемысе але ДМВ-диапазонан тӱжвал антенным веле ушыман. Телевизор тошто гын, цифровой приставке кӱлеш лиеш.

Цифровой эфир телевидений дене кылдалтше чыла йодышым СМОТРИЦИФРУ.РУ сайтыште але федеральный шокшо линийын 8 800 220 20 02 номеран телефонжо дене рашемдаш лиеш.

М.ИВАНОВА.

Опубликовать в Одноклассники

Добавить комментарий