Республикысе Г.И.Григорьев лӱмеш офтальмологический эмлымверыште оптический когерентный томографий (ОКТ) – шинчам лӱдыкшӧ деч посна шымлыме точный йӧн – дене пайдаланат
Кызытсе жаплан келшыше аппарат УЗИ деч палынак раш снимкым ышташ, диагнозым шындаш да эмлымым эскераш полша. Тыглайже ОКТ биопсийын видшылан шотлалтеш, но биопсий годым организм гыч илыше клеткым тергаш налыт, а томографийлан тканьын ужашыже огеш кӱл, тиде – сетчаткын чыла лончыжым да ужшо нервым йыжыҥын-йыжыҥын тергыме инвазивный огыл (тӱкыде) йӧн.
ОКТ сетчаткын да ужмо нервын тӱрлӧ черышт годым кӱлешан, ты шотыштак – ийготым погымо семын вияҥше макулярный дегенераций годым. Макула – сетчаткын эн шижше ужашыже – пужла гын, пациент лудмо, айдемым вигак пален налме, автомашинам виктарыме, ургымо годым монь нелылыкым шижаш тӱҥалеш.
Макулярный дегенераций годым черле сокыр лийын кертеш. Тиде чер илышым палынак локтылеш: лудмо але тыгыде арвер дене пашам ыштыме годым айдеме волгыдырак верым кычалеш, пычкемышыште йомеш, корным ок му, тудлан чыла тӱс шапалга, текст шарла, шинча ончылно шикш гай коеш.
ОКТ торашке уждымо годымат полша.
– Макулярный кумдыкышто иктаж ситыдымаш палдырныме годым тичмаш огыл у вӱргорно-влак лектыт. Тыге вӱр шинчашке пурен кертеш, да айдеме сокыр лийын сеҥа, – каласкала эмлымверын тӱҥ врачше Ирина Абрамова. – Нине вӱргорным ангиогенезын ингибиторжо-влак дене пытарат. Кодшо ий гыч тиде тӱшкаш пурышо луцентис дене пайдаланаш тӱҥалынна. У аппарат пациентын состоянийжым эскераш, препаратын вийжым аклаш полша. Эмлыме йӧн шинча пӱсылыкым саемдаш виктаралтын, но мӧҥгешла сӱретат палдырнен кертеш. Таче ОКТ дене глаукомым, сетчаткысе вӱргорно тромбозым, диабетический макулярный пуалмашым да сетчаткын моло патологийжым диагностироватлаш темлат.
Аппарат шинчан структуржым пеш сайын терга, поснак сетчаткым, ужмо нервым, шинчачорам, ончыл камерысе лукым, шинчасорта йырысе чорам, шинчавундашым чын акла.
Тылеч посна аппарат фундус-камер дене пырля ышта да тидын дене тичмаш тӱсан раш фотосӱретым кызытсе жапыште налеш. Икманаш, ОКТ – офтальмологийыште пайдаланыме ик эн сай инструмент.
Айдеме йырым йырысе тӱня нерген чумыр информаций гыч 80 утла процентшым шинчаже полшымо дене налеш. Сандене тудын тазалыкшым эскерыман, жапын-жапын офтальмологлан тергыктыман.
Шинчам тергыме, шинча пӱсылыкым саемдыме у йӧн эмлаш лийме черын спектржым кумдаҥда, врачлан чын эмлаш йӧным ышта, пациентлан таза ончыкылыклан ӱшаным пуа.
М.ИВАНОВА
