Тений шыжым Москваште эртышашлык «Тӱнямбалын моторжо — 2019» конкурсын финалыштыже Марий Эл гычат ик участник лиеш.
Тиде — Йошкар-Ола гыч 22 ияш модель Любовь Ложкина. Самырык ӱдырын тыгай моторлык конкруслаште сеҥымашыже икымше огыл. 2014 ийыште тудо «Марий Элын жемчужиныже» конкурсышто икымше лийын. Тыгак «Тӱнямбалын моторжо» 2017 ийыште эртыше конкурсыштыжат шке вийжым терген. Тений кумшо гана веле эртыше ты конкурсышто ӱдыр-влак молгунамсе семын сценыш купальник дене огыт лек. Утларакшым нунын тӱжвал сыныштым, творческий мастарлыкыштым ончаш тӱҥалыт. А Любовь сайын мура, шке жапыштыже Чебоксарысе Тӱвыра да сымыктыш институтым тунем лектын. Конкурсын сайтше гыч весат рашемеш: ӱдыр шкенжым модаш гына тӱҥалше актер семын палемден. Тудо 22 ияш да 172 сантиметр кӱкшытан.
С.Носова
Снимкыште: Л.Ложкина
