Крешене кечын вӱд модеш. Таклан огыл 19 январьыште тидым тӱрлӧ верам кучышо-шамычат палемдат. Крешене вӱдын куатшым шотлен, йӱштылаш пурен лектыт, тудым мӧҥгышкышт налын кондат. Пытартыш ийлаште лач ты кечын вӱдым памаш, черке гыч налын кондымо йӱлаже утларак да утларак илышыш шыҥен толмыла чучеш. Молан манаш гын, кажне черке воктен гаяк святой вӱдым налаш кумылан-влакын черетыште шогмыштым ужаш лиеш. Ты але вес памаш деке кает гынат, тыгаяк сӱрет шинчаш логалеш.
Йошкар-Олаште Изи Какшан эҥерысе вӱдыш юмын шӱлышым пуртымо йӱла радамым Вознесений черке воктене эртареныт. Тидлан тушто лӱмын ырес гай форман вакым ыштеныт, воктекыже ий гыч ыресымат шогалтеныт. Туштат вӱдым налаш йӧн лийын.
Тений Крешене кечын чывылталт лекташ шонышо-влаклан Изи Какшан эҥерын рӱдӧ пляжыштыже лӱмын верым келыштареныт ыле. Россий МЧС-ын Марий Элысе Тӱҥ управленийжын специалистше-влак дежуритленыт. Йӱштылаш пурышо-шамычлан вургемым кудаш-чияш посна кок палаткым шогалтеныт. Кӧргыштыжӧ шокшо лийже манын, эсогыл буржуйко коҥгам олтеныт.
Чывылталтме вер воктене тыгак МЧС пашаеҥ-влак шогеныт, туткар ынже лий манын эскереныт. Кече мучко толшыжо шукын лийыныт: илалшат, самырыкат, йоча-шамычат. Теве черке хорышто мурышо ӱдыр-влак тений йӱштылаш эсогыл тӱшкан толыныт ыле. Йошкар-Олаште илыше Татьяна Иванова илалше-влакын пагытышкышт шуын гынат, тений икымше гана йӱштылаш пурыш. Латик ияш Карина уныкажат пеленже чывылталт лекте. «Нимат йӱштӧ огыл», — маньыч. Вате-марий Даниловмыт, акак-шӱжарак Сорокинамыт гын кажне ийын йӱштылаш пурена манын палемдышт.
Республик мучко крешене вӱдыш йӱштылаш пураш чылаже 20 верым келыштарыме лийын. Нуным МЧС-ын 300 наре пашаеҥже эскерен.
Йошкар-Ола воктенсе Корто ялысе памаш воктенат калык шуко ыле. Тушто кок памаш уло: иктыже Николай Чудотворецлан, весыже Казанский Юмын авалан пӧлеклалтыныт. Тушко калык телымат коштеш. А крешенелан корнымат сайын эрыктен шынденыт. Иктышт памаш вӱдым налыныт, весышт йӱштылаш пураш черетыште шогеныт.
Крешене вӱдын чынжымак шнуй виян улмыжым ученый-влакат пеҥгыдемдат. Но нуно тидым религий гоч огыл умылтарат. Ты кечын Мландыште улшо чыла вӱд ойыртемалтше лиеш. Планетынан Кече деке пеш лишке мийымыжлан кӧра вӱд шке свойствыжым вашталта, чын структуран лиеш. Тыгайже идалыкыште ик гана веле вашлиялтеш. Санденак ты кечын налын кодымо вӱд чынжымак эмлыше виян, ӱшандарат специалист-шамыч.
С.Носова.
Снимкылаште: Крешене кечын — вӱдым налаш.
М.Скобелевын фотожо.
