Кажне ийын 13 январьыште Россий Печать кече палемдалтеш. Кеч тудо 1703 ийыште «Ведомости» икымше руш газет лекмылан келыштаралтын гынат, кызыт тудым печать отрасльыште тыршыше-влак веле огыл, тыгак тӱрлӧ изданийын, типографийын, телевидений ден радион журналистше, операторжо, савыктышыже, редакторжо, корректоржо-влак палемдат. Тиде кечын нунын кокла гыч сай паша дене ойыртемалтше, конкурслаште сеҥыше-влаклан тӱрлӧ кӱкшытан наградым кучыктат. Марий Элыштат тыгак. Тений Печать кечылан пӧлеклалтше торжественный мероприятий Э. Сапаев лӱмеш академический опер да балет театрыште эртыш. Кажне ийын республикысе журналист-влаклан Марий Эл Правительствын премийжылан увертарыме конкурсыштат сеҥыше-влакым молгунамсе семын правительстве пӧртышто огыл, театрыштак палемдышт.
Пайрем кечын шуко саламлымаш, пашанам кӱкшын аклыме, тыланыме шомак йоҥгалте. Мутат уке, тидыже ончыкыжымат утларак кыртмен тыршаш кумылаҥда. Вет печать отрасльыште ыштыше-влак, чынжымак, саламлыме мутым ойлышо-влак дене келшаш лиеш, «пагытым ончыктат веле огыл, нуно тудым шкештак ыштат». Манмыла, «мом пера дене возымо, тудым товар денат руэн лукташ ок лий» — возымышт историеш кодеш. Тӱняште, элыште, республикыште мо ышталтме, могай вашталтыш лийме, ты але вес йодыш шотышто умылыдымаш лекме, рашлыкым пурташ кӱлмӧ шотышто лачшымак журналист-влакын надырыштым палемдыман. Чын умылымашым нуно калыкыште шарат. Кажне ой дене калыклан илаш полшат. Тидым саламлыше-влакат палемдышт. Тидланак правительстве, тӱрлӧ министерстве ден ведомство, учреждений, банк ден партий вуйлатыше-влак тауштен ойленыт.
Марий Эл вуйлатышын лӱмжӧ дене печать отрасльыште тыршыше-влакым Марий Эл Правительстве вуйлатышын пашажым жаплан шуктышо Сергей Сметанин саламлен да республикысе правительствын «Марий Эл Республикым социально-экономически вияҥден толмым эн сайын ончыктен шогымылан» премийжын лауреатше-влакым палемден.
«Экономике вияҥмым ончыктымо эн сай паша» номинацийыште «Марий Эл» ГТРК-н увер программе службыжын спецкоржо Анастасия Барауля сеҥышыш лектын. «Ялозанлыкым ончыктымо шотышто эн сай паша» номинацийыште «Марий Эл Телерадион» авторский коллективше ойыртемалтын. «Социальный сферым ончыктымо эн сай паша» номинацийыште «Ваш новый день» арня еда лекше газет редакцийын тӱҥ редакторжо Михаил Винокуров палемдалтын. «Марийская правда» газетын редакторжо Марина Оленёва «Культур илышым ончыктымо эн сай паша» номинацийыште сеҥен. А теве «Республикысе калык-влакын национальный ойыртемыштым ончыктымо эн сай паша» номинацийыште «Кугарня» газетын коллективше ончыко лектын. Советский районысо «Вестник района» райгазетын коллективше «Йоча да самырык-влакын проблемыштым ончыктымо эн сай паша» номинацийыште ойыртемалтын. Ты гана эн сай журналист семын «Марий Элын шӧртньо перажым» «Семейная газета» изданийын пашаеҥже Ольга Годунлан кучыктышт.
«Марий Эл» газет редакций пашаен-влаклан кугешнаш да куанашат амал лийын. Мемнан коллегына-влак вес вере ойыртемалтыныт да палемдалтыныт. Мутлан, ик эн чолга журналистна Любовь Камалетдинова кок конкурсышто сеҥен: республикын Тӱвыра, печать да калык-влакын пашашт шотышто министетрствыжын эртарыме «Журналист-влак террор ваштареш» да республикысе Журналист ушемын «Порылык пера» номинацийыштыже. Вес пашаеҥна Галина Кожевникова тыгак Журналист ушемын конкурсыштыжо « За действенность пера» номинацийыште палемдалтын. А теве коммерческий директорна Юрий Исаков ты конкурсыштак «За верность микрофону» номинацийыште сеҥен. Марий Элын Молодежный политике, спорт да туризм министерствыже редакцийнам сай кылым ыштымылан палемден.
«Марий Эл» газет редакцийнан 27 еҥан колективше кажне кечын поснак яллаште илыше лудшына-шамычлан тырша. Лач нунын нерген утларакшым каласкалена, тургыжланымашым лукшо йодышыштлан вашмутым кычалына, каҥаш дене полшена, илышыштым мыняр-гынат куштылемдаш, кумылыштым нӧлташ тыршена. Кажне арнян гаяк районлаш командировкыш лектын коштына… Толына да возена, возена… Журналистын пашаже пундашдыме шондыкыш оптымо гай, эре материал кӱлеш. Таклан огыл самырык-влак мемнан дене пешыже огыт кучалт. А кӧн ты паша шӱмышкак возын, ятыр ий дене ыштат, сулен налме каныш марте да варат. Кузе нунылан чап лӱмым от пу. Пайрем кечынат тӱҥ редакторын алмаштышыже Светлана Пехметовам «Марий Элын сулло журналистше» лӱмым пуышт. Теве тӱҥ редакторна Александр Абдулов, кусарышына Павел Шакиров Российысе тӱвыран сулло пашаеҥже улыт. Марий Элын сулло журналистше лӱмым налше-влак коклаште Вячеслав Смоленцевым, Юрий Исаковым, Любовь Камалетдиновам, Светлана Носовам ончыктыман. Марий Эл Правительствын Чап грамотшо дене палемдалтше-шамычат уке огытыл. Кажне кечын кыртмен шуктымо пашашт дене нуно тидым сулен налыныт. Печать кече дене пайдаланен, нуным палемдымак шуэш.
С.Носова.
Снимкылаште: Печать кечым палемдыме годым.
М.Скобелевын фотожо.
