Эртыше 2018 ийым «Интеллектуал» тӱвыра да увер рӱдер «Шкет коча-кова-влаклан у ий пӧлекым погымаш» поро кумыл акций дене тӱҥалын да тыгакак мучашлен.
Акцийыш шуко еҥ ушнен. Нунын кокла гыч Йошкар-Олаште илыше 82 ияш Лидия Яковлевна Бороухинам поснак палемдыман. Ӱмыржӧ мучко портнойлан пашам ыштыше илалше ӱдырамаш шкеж гаяк шкет коча-кова-влаклан шуко пӧлекым ямдылен. Марий Эл Радио ден регионын Социальный вияҥмаш министерствыжат чот полшеныт.
Идалык тӱҥалтыште погымо пӧлекым «Сосновая роща» интернат-пӧртыштӧ, Шоя-Кузнецово психоневрологический интернатыште да Кужэҥер специальный пӧртыштӧ илыше шкет еҥ ден инвалид-влаклан официально кучыктымо.
Кодшо ий 30 декабрьыште «Интеллектуал» рӱдерын еҥже-влак адакат «Сосновая роща» интернат-пӧртышкӧ у ий пӧлек дене миеныт, 31 декабрьыште – Кужэҥер специальный пӧртыш. Пытартышыштыже рӱдерын директоржо Эльвира Куклина З.Куклина ден В.Лебедевам шкеак саламлен. Валентина Серафимовнаже у ий пӧлек вашеш шке кидше дене тӱрлымӧ радынам кучыктен.
«Мари Арслан» этнокультурный интернет-журнал» увер рӱдерын уверже негызеш М.ИВАНОВА ямдылен.
