Марий Эл Республикыште «Россий пенсионер-влак ушемын» регионысо пӧлкажым ыштыме.
Тудын учредительный погынымашыже Йошкар-Олаште декабрь мучаште эртен. Регионысо пӧлкан правленийжым Людмила Аркадьевна Ефремовалан вуйлаташ ӱшаныме.
Тӱшка погынымашке республикысе ола ден районласе чыла первичный организацийын еҥже-влак толыныт. Ӱжмӧ уна-шамыч коклаште республикысе ветеран организацийын председательже, Россий Пенсий фондын Марий Элысе пӧлкажым виктарыше, Социальный вияҥмаш министерствын еҥже-влак лийыныт. Нуно погынымашке толшо-влакым регионысо пӧлкам ыштыме дене саламленыт да ончыкыжым пашам пырля ышташ тӱҥалмылан ӱшанымыштым ойленыт.
Мут толмашеш, Марий Элыште 2004 ийыште почмо регионысо пӧлка икмыняр амаллан кӧра пашам ыштымым чарнен, но южо районышто аралалт кодын. Ушемын, мутлан, Йошкар-Оласе, Медведево да Оршанке районласе первичный организацийже-влак «Чолга кужу ӱмыр верч!» девиз дене келшыше пашам кызытат шуят.
Тӱшка погынымаште «Стратегия действий в интересах граждан пожилого возраста до 2025 года» программым илышыш пуртымо кышкарыште эртаралтше Пенсионер-влак ушемын VIII съездшын пунчалже дене келшышын ямдылыме мероприятий планым пеҥгыдемдыме.
Шушаш ийын республикысе пенсионер-влакым шахмат да компьютер многоборье шотышто турнир, спартакиаде-шамыч, хор-влакын конкурсышт, «Пӧрт, кушто илыш умбакыже шуйна» социальный кӱлешлыкан проект да молат вучат. Тыгак илалше-влак республикысе самырык тукым дене патриот шӱлышан пашам вияҥден колташ кутырен келшеныт.
«Марий Элысе пенсионер-влакынат ынде яра жапыштым пайдалын да чолган эртараш, тыгак праваштым да илышыште лекше йодышлаштым аралаш полшышо организцийышт уло», – погынымашым сай кумыл дене мучашлен регионысо пӧлкан председательже Людмила Ефремова.
М.ИВАНОВА.
