Марий Эл Республикым вуйлатыше Александр Евстифеевын кӱштымыж почеш регионысо социальный вияҥмаш министр Ольга Фёдорова ден Морко район администрацийым вуйлатыше Александр Голубков 100 ияш юбилярым саламленыт.
Республикна 100 ийым темыше кажне юбиляр дене кугешна. Курым корным эртыше кажне еҥын – шкенжын илыш корныжо. Анна Максимовна Васильева 1919 ий 2 январьыште Морко районысо Азъялыште кресаньык ешеш шочын. Тӱҥалтыш школышто кок классым тунемын да пашам ышташ тӱҥалын. Тудын чын илыш школжо «Родина» колхоз лийын: Анна Максимовна тушто ӱмыржӧ мучко пашам ыштен. 1947 ийыште фронтовик Александр Васильевичлан марлан лектын. Вате-марий Васильевмыт 52 ий ваш йӧратен, келшен да пагален иленыт, ныл йочам ончен куштеныт. Таче Анна Максимовнам кок эргыже, вич уныкаже да уныкаже-влакын ныл шочшышт куандарат.
Саламлымыж годым О.Фёдорова Анна Максимовнан ӧрыктарыше, пеҥгыде кӧргӧ виян тукым гыч улмыжым палемден.
«Тыгай юбилей шуэн лиеда. Ме шке илыш, койыш, паша гоч самырык тукымлан мунлыкым кӱсынлаш йӧным ыштыше кугу илыш опытан кажне еҥым пагалена. Сандене тыгай айдемым 100 ияш лӱмгечыж дене саламлаш – кугу чап», – палемден социальный вияҥмаш министр О.Фёдорова.
М.ИВАНОВА.
