Йошкар-Олаште эше ик турист объект — Мастарлык пӧрт — почылтын.
Тудо «Чарла кремль» культурно-исторический комплексыш пурышо Наумов купечын пӧртыштыжӧ вераҥын. Октябрь революций деч ончычсо архитектур памятникым республикысе тӱвыра поянлык объект-влак радамыш шукертак пуртымо. Тиде оралтын икымше пачашыже кермыч гыч, кокымшыжым пу гыч ыштыме. Аркан окна-влакым, леведыш йымалсе карнизым пу гыч пӱчкедыме серга дене сылнештарыме. Кызыт ты оралте тӱвыра- просветительский комплексыш савырнен манашат лиеш. Ончыкыжым туштак Марий йомак тоштерат пашам ышташ тӱҥалшаш. Тудым вес шошым почаш палемдыме.
А кызытеш Наумовын оралтыштыже Керамике тоштер, «Самовар» творческий мастерской пашам ыштат. Икымшыштыже шун гыч ненчыме да художественный роспись матерской пашам ышта. Весыштыже художественный творчествылан шӱмаҥдат. Ынде эше Мастарлык пӧрт лиеш.
У тоштер пелен шун гыч ненчыме производствым пашаш колтат, марий тӱрым тӱрлаш, куэмым куаш, тошто йӱла почеш пум, коваштым обрабатыватлаш, куэ кумыж, ний гыч арвер ден сувенирым ышташ, шыштым велаш, тӱрлӧ сортам ышташ тӱҥалыт. Икманаш, калык усталыкым вияҥден колташ шонат. Санденак нине направлений дене тӱрлӧ мастер-классым, семинар ден курсым, ончер ден конкурсым эртараш палемдыме. Тушто ыштыме чыла кидпашам ты оралтыштак вераҥдыме сувенир лавкыште ужалаш тӱҥалыт.
Кидмастар пашалан шӱмаҥдыме, паша опыт дене пайлалтме семинар ден конференций-влакым республикысе моло тыгай мастарлык пӧртыштӧ, творческий ушемлаште тыршыше-шамычланат эртараш шонат. Тидыже кундемыштына калык творчествым вияҥден колташ утларак полшышаш. Чыла тидын нерген Мастарлык пӧртым почмо годым Марий Эл Правительстве председательын икымше алмаштышыже Михаил Васютин, тӱвыра, печать да калык-влакын пашаш шотышто министр Константин Иванов ойленыт.
Весымат ончыктен кодыман. Мастарлык пӧртым почмо годым тыштак «У истоков ремесла» ончер почылтын. Тудым В.М.Васильев лӱмеш Йылмым, сылнымутым да историйым научно шымлыше марий институтын специалистше-влак ямдыленыт. Тушто Марий кундемыште ожнысек сайын вияҥше кидпаша дене палдарат: тӱрлӧ тӱсан кӱртньӧ гыч ӱзгар ден арверым ыштымаш, пушеҥгым, лум обрабатыватлымаш, куэмым куымаш да тулеч моло. Мутат уке, материал ден экспонат-влакым погаш ятыр ий каен. Поснак археолог-влаклан тыршашышт логалын. Тушко нуно акрет марий-влакын IX–XII курымласе шӱгарлашт гыч кок тӱжем наре экспонатым чумыреныт. Чыла тидыже — марий-влакын илыме верлаш археологий экспедицийлам эртарыме пашан лектышыже.
С.Носова.
Снимкылаште: Мастарлык пӧртым почмо годым.
М.Скобелевын фотожо.
