2019 ий мыланна кум пачаш кугурак йодмашан лиеш.
Ик могырым, Унчо селана шушаш ийлан финн-угор тӱнян тӱвыра рӱдыверже семын увертаралтын. Мыланна тиде кугу чап да ӱшан. Тыгай кажнылан ок пуалт. Тидым ме марий шӱлышан улмына да тӱвыранам арален кодымына дене суленна. Ончыкыжат чонна ынже йӱкшӧ, а кумылна нӧлтшӧ лийже!
Вес могырым, шушаш ийыште Марий Элнан Кугыжаныш Погынышкыжо сайлымаш вуча. Кӧ мемнан праванам тушто аралаш, йылмынам арален кодышаш да ялнан ончыкылыкшо верч тыршаш тӱҥалеш? Шкенан калык гычак лекше еҥ огыл мо? Сандене йӱклымыда годым шоналтыза.
Кумшо могырым, озанлыкнан шушаш ийлан паша планже кугу. Мландымат, вольыкымат ешарен толман, урлыкымат, пашамат саемдыман. Тыге гына у кӱкшытыш шуаш лиеш. А тидлан кажнылан умылымашым, шке деч пеҥгыдын йодмашым, ваш-ваш пагалымашым да илен моштымашым тыланем! У ий дене, у пиал дене!
Ю.А.Игнатьев,
«Передовик» СХА-н председательже.
