УВЕР ЙОГЫН

Ипполит Алыков – тукым изам

4 декабрьыште лекше газетыштыда Ипполит Лобановын «Йӧным муын моштышо оза» статьяжым куанен лудым. Публикацийын тӱҥ геройжо Ипполит Алыков – тукым изам: авана-шамыч ака-шӱжар лийыныт. Нунын Лида шӱжарышт кызытат ила, Килемар районысо Шӹкшансола ялыште.

Авам, Хиония Ивановна Комиссарова, 12 ияшак ача-ава деч посна кодын. Кидыштыже эше куд ияш шӱжарже лийын, а Евгения акажым калык тушманын йочаже семын чодыра пашаш виеш наҥгаеныт. Ковашт Екатерина Матвеевна Мишина чот черле лийын, вакшыш гыч кынел кертын огыл.

Авам чыла колхоз пашаш коштын. Тудымат калык тушманын шочшыжо семын бригадир чот обижатлен: пареҥгым аралыме пычкемыш хранилищыш йӱштӧ теле деч вара кодшо вожсаскам ойыраш петырен шынден. Тыгай икшывыже кандашын лийыныт. Бригадир паша кече жапыште хранилище омсам икмыняр гана почын да кычкырен: «Эй, те тушто эше тӱнчыген огыдал?» Колхоз паша, неле илыш деч нойышо авам мӧҥгӧ пӧртылмыж годым ойгыжо да ӧпкеж дене пасу покшеланак сукалтен шинчын да уло чонжо дене сӧрвален: «Кугу Юмо, улат гын, полшо мыланем! Ковам йол ӱмбаке шогалте!» Чудо кужун вучыктен огыл. Ик кечын калиткам почын пурышо авам пӧртӧнчылнӧ чылт таза, пиал дене волгалтше коваже, шергакан уныкажым оҥжо пелен ӧндалаш манын, кидшым шуялтен вашлийын: «Хони!.. Хониэм! Илена ынде, чыла сай лиеш». Тиде сайже сар мучко шуйнен: нуно икте-весым пагален, чаманен да аклен иленыт.

Сар деч вара авамын акаже Тышналыш марлан лектын, Яндусолаште верланыше ача-ава суртым ужален. А ковам шкеж деке, тыгак Алексей ден Ипполит эргыже-влакым ончаш налын.

Текуса Трускова-Шестакова.

Железнодорожный ола.

 

Опубликовать в Одноклассники

Добавить комментарий