Марий Турек районысо Ӱлыл Мосараште огыт йокроклане
Ончыч Ӱлыл Мосараште тӱҥалтыш школ лийын гын, кызыт тудын олмышто клубым почыныт. Оралте 1968 ийыште чоҥалтын. Клубышто газ уке, садлан коҥгам пу дене олташ перна.
Тӱвыра учрежденийым Т.Г. Зайцева вуйлата.
— Тӱвыра аланыште мый 16 ий пашам ыштем. Ончыч Кӱшыл Мосара тӱвыра пӧртыштӧ тыршенам. Тыште школым петырымеке, тышке толынна. Кӱшыл Мосараште кызыт тӱвыра пӧрт уло, но пашам ок ыште, — рашемдыш Татьяна Германовна.
Ӱлыл Мосара клубышто тӱрлӧ кружок-влак пашам ыштат, арнялан кок гана чумыргат. «Бисерок» кружокым Татьяна Германовна вуйлата, «Ший оҥгыр» вокальный кружокым – Р.Ф.Волкова.Тыгак «Марий кумыл» да «Трио кумыл» ансамбль-влак улыт. «Марий кумылыш» шукыжым илалше-влак коштыт, мурат, куштат, тӱрлӧ оҥай сценке-влакым ончыктат. А «Трио кумыл» – тиде туныктышо-влакын коллективышт. Тиде ансамбль-влак дене чӱчкыдын концертлашке лектын коштыт.
Кызытсе жаплан тиде клубышто вуйлатыше, кружокым вӱдышӧ да арулыкым кучышо пашам ыштат. Кӱшыл Мосара йочасадыште пашам ыштыше Г. Н. Старшевам тӱрлӧ мероприятийым эртарыме годым вӱдышӧ семын ӱжыт.
Татьяна Германовнан вуйлатыме кружокыш шым тунемше коштеш. Икшыве-влак клубыш уло кумылын толыт. Занятийыш толмекышт, вуйлатыше нунылан икмыняр жапым каналташ пуа. Йоча-влак модыт, куржшталыштынат налыт. Вара бисерым кидышкыш налын, тӱрлӧ сӧрал модышым ышташ пижыт. Бисерым ышташ пеш неле паша, шинча тӱткылык, лывырге кид кӱлеш. Йоча-влак шке пашаштым ыштен пытарымеке, куанат, мо кертмыштлан ӧрыт. Тыге нуно тиде пашалан эше чотырак шӱмаҥыт. Занятийышт ик шагат кая. Южгунам, йӧсырак лийме годым, шукыракат шинчат. Но шинча нойымылан кӧра, шукыжак шинчет огыт керт. Ӥӱштӧ игече годым кидат кылма, садлан графикышт вашталтынат кертеш. Модыш-влакым тӱрлӧ выставкыш колтат, сеҥымаш-влакат улыт.
Кызыт калык шуко жапым телевизор, компьютер воктене эртара. Тӱрлӧ концертлашке шагал погына. Туге гынат тӱвыра пашаеҥ-влак шуко мероприятийым эртараш тыршат. Пытартыш гана аван кечыжлан пӧлеклалтше пайрем лийын. «Марий кумыл» ансамбль ден йочасадыш коштшо йоча-влак концертым шынденыт. Кызыт У ий пайремлан ямдылалтыт. Сценкыште тӱрлӧ рольым модаш Татьяна Германовна шке ешыжым полшаш ӱжеш: пелашыжым, ӱдыржым, эргыжым. «Марий кумыл» ансамбль гычат шке кумылын полшаш толыт.
– Мемнан кугу эҥертышна – тиде «Марий кумыл» ансамбль. Тудын участникше-влак эртарыме чыла мероприйыш ушнат. Тиде ансамбльым клубын пурла кидше манын кертам. Тудын дене кеч-могай нелылыкымат сеҥаш лиеш, – ешара клуб вуйлатыше.
Татьяна Германовна шуко жапым пашаште эртара гынат, ешланат жапым муаш тырша. Кызыт эргыже икымше классыште тунемеш: книгамат лудман, мӧҥгысӧ пашамат ыштен шуктыман. Тыгак дзюдо кружокыш коштыт.
Пошкудо Кӱшыл Мосара ялыште книгагудо верланен. Тудым Е.Я.Мушкина вуйлата. Тудо шкежат «Марий кумыл» ансамбльын чолга участницыже. Тыгак тиде ялыште йочасад уло. Икманаш, тиде кундемыште чылажат ваш кылдалтын, чыланат ваш полшен илат . Вет чынак, воктенет полыш уло гын, чыла нелылыкым сеҥен лекташ лиеш.
Е.Ёлкина
