2018 ийыште Марий Элын бюджетышкыже РФ правительствын резерв фондшо гыч 100 марте еҥан яллаште да селалаште профилактике сынан тергымашым эртараш полшышо куснылшо медицине комплексым налашлан 51,8 млн. теҥге кугыт бюджет ассигнований пурен.
Тыге, район-влак кокласе Козьмодемьянск эмлымверлан ноябрьыште цифровой флюорограф ден рентген маммографий цифровой аппаратым ушышо куснылшо медицине комплексым 17 млн. утла теҥгеш, декабрь кыдалне Волжск оласе да Звенигово ден Шернур районласе рӱдӧ эмлывер-влаклан цифровой флюорографан куснылшо флюорографий кабинетым чылаже 31,8 млн. теҥгеш налме.
Куснылшо нине аппарат полшымо дене тымарте 1,3 тӱжем утла флюорографий шымлымашым эртарыме, 800 утла ӱдырамашым маммограф дене тергыме.
М.ИВАНОВА.
